FFTL fó formasaun ba treinadór futeból salaun (futsal) na’in-20 iha nivel báziku. Imajen/FFTL

DILI, 24 agostu 2021 (TATOLI) – Federasaun Futeból Timor-Leste (FFTL) fó formasaun ba treinadór futeból salaun (futsal) na’in-20 iha nivel báziku (Futsal Basic Coaching Course).

Sekretáriu Jerál FFTL Nelio Isaac Sarmento hateten, formasaun ne’e atu aumenta koñesimentu treinadór futsal sira nian, nune’e bele lidera klube sira futsal ne’e tuir regra Federation International Football Association (FIFA).

“Formasaun ne’e ita fó ba ema ne’ebé iha interese atu sai hanesan treinadór futsal, sira ne’e maioria hosi treinadór sira klube futsal nian, tuir regra FIFA treinadór sira tenke iha lisensa hanesan mós treinadór kampu boot hahú hosi nivel A-D, ida D ne’e mak báziku entaun sira tenke tuir para hetan lisensa nune’e bele kaer klube,” Nelio  Isaac Sarmento informa ba Agência Tatoli iha edifísiu FFTL, Dili, tersa ne’e.

Nia dehan, formasaun ne’e hanesan parte da-uluk ida ne’ebé FFTL halo atu dezenvolve futsal bele sai hanesan futeból kampu boot.

“Nune’e mak ita iha komunika ho AFC no sira rekomenda ita nia asesór ba treinadór edukasaun Sr. Gopal iha koñesimentu formasaun ba sertifikadu futsal nian, entaun fó autorizasaun hodi loke kursu báziku ne’e,” nia dehan.

Formasaun ne’e hahú ohin no remata semana oin. Bainhira remata, treinadór hotu hetan kedan sertifikadu ba lisensa D.

Jornalista   : Hortencio Sanchez

Editór        : Francisco Simões 

HAKEREK NO HATÁN

Please enter your comment!
Please enter your name here