Diretór Nasionál Promosaun Dezenvolvimentu Mídia Lokál, José da Costa. Imajen TATOLI/Francisco Sony

DILI, 23 agostu 2021 (TATOLI)–Sekretaria Estadu Komunikasaun Sosiál (SEKOMS) selebra akordu ho Rádiu Komunidade estabelesidu hodi realiza transferénsia fundu ba daruak hodi apoiu funsionamentu meiu komunikasaun ne’e.

“Akordu ne’e la’ós ba dahuluk, maibé hahú ona desde tinan 2015 Governu liuhosi SEKOMS kontinua apoiu Rádiu Komunidade estasaun 16 liuhosi fundu transferénsia públika, ne’ebé tinan ne’e halo transferénsia ba daruak,” Diretór Nasionál Promosaun Dezenvolvimentu Mídia Lokál, José da Costa, informa iha salaun JL Villa, Fatuhada, segunda ne’e.

Tuir nia, antes ne’e, SEKOMS fó apoiu ona ba fulan-neen no daudaun asina akordu hodi transfere ba faze daruak.

Apoiu orsamentu faze daruak hamutuk $75.000 ba Rádiu Komunidade 16, ne’ebé kada rádiu sei hetan $4.000 to’o $6.000.

Aleinde ne’e, SEKOMS apoia mós Rádio ema ho Defisiénsia ba tinan ne’e ne’ebé estabelesidu ona ho modelu free test.

Programa sira-ne’ebé rádiu sei implementa hosi orsamentu ne’e maka produsaun notísia lokál, notísia online, produsaun Talk Show, produsaun teatru ka drama no produsaun mensajen badak sira.

Rádiu komunidade 16 ne’ebé eziste maka Tokodede Liquiçá, Rádiu Komunidade Comoro, Cova Taroman Suai, Atoni Lifau Oé-cusse, Vox Populi Lospalos, Mauloko Maubisse, Manukoko Ataúro, Ili-Wai Manatuto, 1912 Same, Lian Matebian Baucau, Kolelemai Sahe Bucoli, Rai-Husar Aileu, Povu Viqueque, Kafe Ermera, Lian Tatamailau Ainaro, no Rádiu Komunidade Maliana.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here