Atividade ne’ebé formandu sira hosi Sentru Formasaun Foinsa’e Unidade Dezenvolve Futuru (FUNDEF) hala’o. Imajen/Espesiál.

DILI23 agostu 2021 (TATOLI)—Sentru Formasaun Foinsa’e Unidade Dezenvolve Futuru (FUNDEF), dadaun ne’e planeia ona sei reativa formasaun iha fulan setembru tinan ne’e.

“Daudaun ne’e ami planu ona atu reativa formasaun iha fulan setembru tinan ne’e,” Diretór Sentru Formasaun Foinsa’e Unidade Dezenvolve Futuru (FUNDEF), Carlos Moniz Gonçalves, hateten ba Agência Tatoli, via teléfonika, segunda ne’e.

Bainhira, atu reativa filafali formasaun ne’e, sentru ne’e rasik sei fó sai avizu ba formandu sira liuhosi pajina FUNDEF nian no sei kontaktu direta mós ba formandu sira-nia númeru telefóne sira, nune’e sira bele filafali mai tuir formasaun.

Atu reativa formasaun ne’e, sentru ne’e nafatin kumpre regra prevensaun COVID-19 hosi Ministériu Saúde (MS) no Organizasaun Mundiál Saúde (OMS), nune’e bele prevene no kombate moras ne’e iha Timor-Leste.

Nia informa, totál formandu ne’ebé tuir formasaun iha 2021 ne’e hamutuk na’in87 ne’’e kompostu hosi mane 47 no feto 40 ne’ebé tuir formasaun iha área administrasaun finansas, lian inglés, komputadór no informátika (IT).

Sentru formasaun ne’e harii iha tinan 2010, ne’ebé funda hosi Carlos Moniz Gonçalves ho objetivu oinsa atu kapasita joven sira hodi bele reforsa sira-nia kapasidade no abilidade, nune’e prepara joven sira hodi kompete iha kampu traballu.

Totál formandu ne’ebé tuir formasaun iha tinan 2010 to’o 2021 hamutuk 7.490 no hosi númeru ne’e na’in1.203 mak hetan ona servisu. Balun servisu ona iha instituisaun Governu, empreza, no organizasaun naun Govermentál (NGO).

Enkuantu totál funsionáriu no formadór hamutuk na’in13 no formadór mesak lisensiaadu/a iha área formasaun ne’ebé sentru ne’e estabelese.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here