Ekipa CAC, aprezenta arguidu no arguida na’in-haat ba Tribunál Distritál Dili (TDD), hodi submete ba primeiru interrogatóriu, sesta (20/08). Imajen Tatoli/Francisco Sony.

DILI, 20 agostu 2021 (TATOLI)—Komisaun Anti Korrupsaun (CAC, sígla portugés), lori ona emprezáriu na’in-haat ba Tribunál Distritál Dili (TDD), hodi submete ba prosesu primeiru interrogatóriu.

Emprezáriu hirak-ne’e sai arguidu, no  kumpre ona detensaun iha sela CAC durante oras 72.

Notísia relevante:CAC detein emprezáriu na’in-haat

Nune’e, ekipa CAC kontinua aprezenta ba Tribunál  hodi submete ba primeiru interrogatóriu, ne’ebé hatais roupa faru detidu CAC no iha liman futu metin ho aljema.

Prosesu primeiru interrogatóriu ne’e hahú iha tuku 14:00 no tuku 18:00 otl,  rona ona deklarasaun arguida na’in-rua, maibé juiz prezide deside suspende, hodi kontinua ba aban tuku 14:00 otl  atu rona arguidu na’in-rua seluk,  no ekipa CAC asegura kedan lori hikas arguido-sira ba sela detensaun CAC.

Iha loron 17 agostu, CAC ezekuta mandadu buska domisiliáriu apreensaun no mandadu detensaun ho NUC 0024/21.PGGCC hosi (TDD), ba arguida no arguidu na’in-haat ho inisiál  RH, NS, GMBC no AK, ne’ebé suspeita ho krime fraúde fiskál iha artigu 314 no brankamentu kapitais previstu iha artigu 313  iha kódigu penál, tanba deskonfia  hala’o atividade ekonómika  liu hosi sira-nia  kompañia importa karreta, motór, ekipamentu médiku no ai-moruk mai TL  no suplay  iha rai laran, maibé desde 2012 to’o agora la selu taxa ba Estadu ho valór prejuizu rihun $200-resin.

Nune’e, liuhosi mandadu buska ekipa investigadór CAC hala’o buska ba iha rezidénsia suspeitu sira-nian iha Bairru-Pité, inklui iha edifísiu  kompañia iha Fatuhada no arguida ida ka’er iha arredór eskola Institutu Ciênsia Saúde (ICS) Comoro.

Durante iha terrenu, ekipa CAC rekolla ona dokumentu lubuk ida hanesan atividade lisensa kompañia no dokumentu ne’ebé iha relasaun ho projeitu ne’ebé kompañia durante sai vensedór barak iha Ministériu Saúde no RAEOA, ligadu ho fornesimentu ekipamentu médiku ho sira seluk.

Maski nune’e, kompañia ne’e ninia sertidaun dividas inválidu ho la selu taxa ba Estadu, maibé kontinua manán projetu iha Governu.

Prosesu primeiru interrogatóriu ne’e prezide hosi juiz José Gonçalves no Ministériu Públiku reprezenta hosi Prokuradór Matias Soares no arguidu ho arguida-sira hetan asisténsia legál hosi advogadu privadu Pedro Aparicio.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here