Padre fó bensaun ba sede Jerasaun Patriota ne’ebé foin inaugura, iha Villa nova, kinta (19/08). Imajen TATOLI/Natalino Belo

BAUCAU, 19 agostu 2021 (TATOLI)–Jerasaun Patriota ofisialmente inaugura sede foun iha Baucau ho objetivu konsolida forsa hamutuk atu kontinua luta liberta povu hosi kiak no mukit.

Reprezentante Jerasaun Patriota Baucau, Alarico Daitula Junior, hateten, inisiativa ne’e atu kontinua luta mehi hosi eroi sira ne’ebé uluk fó an ba mate.

“Ami konsolida forsa no kbiit hotu, liuhosi ami-nia komunikasaun ba malu, ohin ami harii ona sede iha Baucau, ne’ebé sai referénsia ba munisípiu seluk atu hamutuk konsolida an atu sai forsa no alternativa tuir erói sira-nia luta ba rai no povu ne’e,” Alarico dehan iha sede Jerasaun Patriota, Villa nova, kinta ne’e.

Tuir nia, ekipa ne’e tenki konsolida forsa tomak tanba durante ne’e la’o namkari no partidu polítiku sira utiliza Jerasaun Patriota hanesan instrumentu, tanba ne’e presiza konsolida sai forsa.

“Fatin mahon ne’e atu halibur no konsolida forsa hotu no identifika problema ne’ebé Estadu, nasaun no povu hasoru,” nia akresenta.

Iha fatin hanesan, Veteranu Adjuntu Rejiaun II, Amaro Freitas ‘Lasikati’, fó apoia tomak tanba konsiente katak daudaun ne’e ninia idade avansadu ona, nune’e fó konfiansa tomak ba Jerasaun Patriota atu hatutan luta liberta povu hosi kiak no mukit.

“Ami-nia maluk veteranu sira mak mate, maibé espíritu luta sei kontinua hosi Jerasaun Patriota atu partisipa iha dezenvolvementu nasional,” Lasakati subliña.

Nune’e, nia husu ba Governu atu tau atensaun másimu no fó oportunidade atu asesu ba edukasaun nível altu.

Hafoin halo inaugurasaun sede, halo misa agradesimentu no vizita restu mortál Saudozu Vizente Reis Bie ki Sahe no taka ho reflesaun ho tema ‘Refleta pasadu hodi hametin espíritu patriotizmu no nasionalizmu iha faze dezenvolvementu nasional’.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here