MSSI ho MESSK troka nota entendimento kona-ba asesu ensinu superiór publiku ba tinan akademiku 2022, kinta (19/08). Imajen Tatoli/Egas Cristovão

DILI, 19 agostu 2021 (TATOLI)-Ministériu Solidariedade Sosiál no Inkluzaun (MSSI) ho Ministériu Ensinu Superiór, Siénsia no Kultura (MESSK), hamutuk ho Ministériu Administrasaun Estatál (MAE) no Ministériu Asuntu Kombatente Libertasaun Nasionál (MACLN-sigla portugés), sesta ne’e, asina memorandu entendimentu ba implementasaun asisténsia programa ema vulneravel ho defisiénsia asesu ba ensinu superiór públiku ba 2022.

Ministra Solidariedade Sosiál no Inkluzaun, Armanda Berta do Santos hateten, objetivu hosi asina memorandu ne’e oinsá ba oin bele ajuda estudante vulneravel no defisiente sira ne’ebé bainhira ramata sira-nia estudu iha ensinu sekundária bele kontinua ba iha ensinu superiór públiku.

Selebrasaun asina nota entendimentu entre ministériu relevante sira ne’ebé hala’o iha salaun MSSI, Caicoli, Dili, Ministra Armanda Berta do Santos, klarifika katak, iha asina memorandu involve hotu Ministériu Administrasaun Estatál no Ministériu Asuntu Kombatente Libertasaun Nasionál, tanba bainhira atu halo implementasaun kona-ba dadus sira ne’e sei servisu hamutuk ho MAE no MACLN tanba sei haree mós ba veteranu nia oan hotu asesu ba ensinu superiór.

Ministériu Ensinu Superiór Siénsia no Kultura, Longuinhos dos Santos hateten,  prosesu asesu ba ensinu superiór públiku ne’e iha rejime rua, mak jerál no espesiál, ne’ebé rejime jerál foka liu ba finalista ne’ebé mak ramata hosi eskola ensinu Sekundária jerál no Tékniku vokasionál, no rejime espesiál fó oportunidade ba estudante finalista ne’ebé akaba nia estudu tinan haat liubá la kontinua eskola, no ba veteranu nia oan sira, vulneravel, Polisia Nasional Timor-Leste (PNTL) ho FALINTIL-Forsa Defeza Timor-Leste  (F-FDTL).

“Rejime espesiál ne’e iha modalidade neen, maibé asina memorandu ne’e iha mudansa balu Ezemplu rejime jerál ita fahe ba sub-rejime rua mak rejime ensinu sekundária jerál no tékniku vokasionál, ita fahe ba rua tanba kada tinan ita hasoru difikuldade bainhira atu identifika estudante ne’ebé sai di’ak liu tanba ensinu sekundária jerál iha nia disiplina ne’ebé mak kuantidade makaas, kompara ho tékniku vokasionál ne’ebé matéria ezame haat, entaun haree valór kualifikasaun ne’e la to’o ensinu sekundária jerál,” nia dehan.

Atu asesu ba ensinu superiór públiku mudansa seluk mak proposta mai hosi Universidade Nasionál Timor Lorosa’e (UNTL), no Institutu Politéknika Betano (IPB), entaun iha asina memorandu ne’e involve hotu MAE atu haree liu ba rejime hakbiit foti deklarasaun hosi aldeia, suku sira katak loos duni ka lae, kandidatu sira ne’e mai duni hosi suku orijen,  no defisiente sei haree liga ba Asosiasaun Defisiente hodi haree dadus.

Alterasaun ba kalendáriu prosesu asesu ba ensinu superiór públiku,  Longuinhos dos Santos afirma, sei hahú iha janeiru, fevereiru 2022. Tanba liuhosi meta MESSK bolsa hakbiit to’o 2023 asesu ba ensinu superiór públiku tenke to’o na’in-3,000, entaun 2021 hahú ho númeru 910, ne’e mak 500 ba ensinu superiór públiku, 410 ba ensinu superiór privada sira, ne’ebé restu ne’e sei rekruta iha 2022-2023.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here