Diretór Ezekutivu Sentru Formasaun Fundasaun Hadomi Timor, Abrão Monteiro. Imajen/Esesiál.

DILI19 agostu 2021 (TATOLI)—Sentru Formasaun Fundasaun Hadomi Timor, sabádu (21/08) ne’e, sei realiza formasauun ‘video editing’ ba joven sira iha Aula Fundasaun Falur Ratek Laek.

Notísia Relevante: Fundasaun Hadomi Timor oferese formasaun ba estudante ativu sira

Diretór Ezekutivu Sentru Formasaun Fundasaun Hadomi Timor, Abrão Monteiro, hateten formasaun ne’ebé Fundasaun Hadomi Timor realiza ne’e ho durasaun loron ida foku liu ba ‘video editing’ liu-liu atu utiliza ba smartphone, android iha aplikasaun KineMaster.

“Ami haree katak kuaza ita-nia estudante no sidadaun maioria utiliza tiha ona smartphone no maioria sempre utiliza smartphone hodi halo video no hodi foti imajen. Tanba ne’e, ami ho inisiativa realiza ida-ne’e, hodi sira bele prodús sira-nia video no foti imajen ho kualidade,” Abrão Monteiro hateten ba Agência Tatoli, iha nia knaar-fatin, Faról, Dili, kinta ne’e.

Sentru Formasaun Fundasaun Hadomi Timor hakarak atu enkoraja joven sira, nuune’e sira bele iha koñesimentu di’ak ba iha tékniku ato foka (syuting) no tékniku foti video, halo edisaun hodi prodús sira-nia video no upload ba iha youtube.

“Atu hamenus dezempregu, tuir ami Fundasaun Hadomi Timor nia hanoin, dalan ida mak ita kria kondisaun ba plataforma youtube. Tanba bainhira ema hotu kreativu prodús video ne’ebé ho kualidade, sira tau iha sira-nia youtube, iha tempu ida sira sei hetan ninia benefisiu ne’ebé sufisiente ba sira-nia moris, liuu-liu oinsá atu redús ba dezempregu,” nia dehan.

Tanba, nia argumenta, haree esperiénsia iha rai-li’ur ne’e maioria joven hotu-hotu iha nia konteúdu (konten) lokál, hanesan konteúdu ne’ebé bele ajuda ema seluk no hosi ninia produsaun konteúudu ida-ne’e nia bele hetan osan.

“Mezmu ita Timor-Leste seida’uk to’o iha ne’ebá maibé ita tenke prepara an. Tanba, ita mós hatene katak ita-nia Governu liu-liu hosi Teknolojia Informasaun no Komuunikasaun (TIC Timor,I.P) agora daudaun aselere ona ita-nia servisu kona-bá atu dada kabu submárinu mai Timor-Leste ho objetivu atu aselere internet. Entaun, ita joven tenke prepara no kontinua halo barak ho nune’e ita mós bele utiliza di’ak duni internet ne’ebé sei mai ho velosidade ne’ebé maka’as. Ita labele hein de’it bainhira internet ne’e mai ita la iha konteúdu no ita só uza internet hodi loke WhatsApp no facebook de’it, ne’ebé lahetan benefísiu ba ita-nia an no ba ita-nia rai,” nia akresenta.

Formadór ne’ebé fó formasaun ne’e hanesan membru ida hosi community youtuber Timor-Leste no nia iha esperiénsia di’ak ba ‘editing video’ nian.

Totál partisipante ne’ebé tuir formasaun ne’e hamutuk 25 ne’ebé mai hosi hosi sentru ne’e rasik, inklui estudante universidade iha Díli laran mak hanesan estudante hosi Universidade Nacional Timor Lorosa’e (UNTL), Institute of Business (IOB), Universidade Dili (UNDIL), Universidade da Paz (UNPAZ) no Universidade Oriental Timor-Lorosa’e (UNITAL).

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here