Xefe Departamentu Transporte Terestre no Komunikasaun RAEOA, Domingos de Almeida. Imajen Tatoli/Abílio Elo Nini

OÉ-CUSSE, 19 agostu 2021 (TATOLI)—Hahú hosi trimestre dahuluk to’o daruak, janeiru-marsu no abríl-juñu 2021, Servisu Dirasaun Rejionál Transporte Terrestre no Komunikasaun Rejiaun Administrativa Espesiál Oé-Cusse Ambeno (RAEOA), kontribui reseita $15,339.50 ba kofre Estadu.

“Tuir relatóriu primeiru trimestre no segundu trimestre nian ne’e, Departamentu Transporte Terrestre no Komunikasaun RAEOA, rekolla reseita hodi kontribui ba kofre Estadu hamutuk rihun $15,339.50,” Xefe Departamentu Transporte Terrestre no Komunikasaun, Domingos de Almeida, informa ba Agência Tatoli, iha Palaban, Suku Costa, Sub-Rejiaun Pante Makasar, Oé-Cusse, kinta ne’e.

Reseita ne’e mai hosi rejistu dokumentu hamutuk ema na’in-118 ho osan $2,453.50, Inspesaun hamutuk na’in-654 ho montante $5,790.00, trata karta kondusaun hamutuk ema na’in-306 ho nia montante $5,221.00, lisensa trajetu transporte hamutuk na’in-107 ho osan $1,875.00, maibé taxa hirak ne’e tun maka’as kompara ho antes pandemia COVID-19 mosu.

“Ita-nia reseita tinan kotuk to’o tinan ne’e reseita menus tanba impaktu hosi estadu emerjénsia no serka sanitaria. Iha 2019 tun ba kraik ne’e, reseita kada tinan sa’e maka’as,” nia haktuir.

Xefe Departementu ne’e hateten, durante implementasaun servisu instituisaun estadu nian rua ne’e liu-liu hosi Dirasaun Transporte Terrestre no Komunikasaun ho Polisía Unidade Tranzitu nia koordenasaun hodi servisu hamutuk to’o iha rejionál ne’e la’o di’ak tebes.

Hanesan iha área transporte bainhira parte tranzitu sira hala’o atividade pasarevista sei koordena ho Dirasaun Transporte no hosi Dirasaun Transporte indika ho dokumentu ruma, ho nune’e bele garante servisu Estadu nian ne’e la’o efikasia no tuir regulamentu Estadu nian.

Nu’udár responsavél iha Departementu Transporte Terrestre no Komunikasaun iha Rejiaun Administrativa Espesiál Oé-Cusse Ambeno, nia apela ba motorista sira atu regulariza dokumentu sira nune’e bele hala’o movimentu livre no mós uza kapasete, monta espellu, atu bele asegura bainhira dezastre ruma akontese.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here