Maudoko FC kontra Valeia de Lahane (VDL) iha Estadiu Munisipál Dili, kinta (19/08). Imajen Tatoli/Francisco Sony

DILI, 19 agostu 2021 (TATOLI) – Federasaun Futeból Timor-Leste (FFTL), kinta ne’e, iha Estádiu Munisipál Dili, ofisiálmente halo abertura ba jogu Liga Feto Timor (LFT). Iha primeira  jornada, segundu divizaun ne’e, ekipa Valeia de Lahane (VDL) manan FC Mauduko ho rezultadu 2-0.

Bainhira jogu hala’o ekipa rua lansa kontra ho atake ba malu tuir idaidak nia tékniku. Maudoko joga ho modelu ofensivu no kontra atake maka’as iha liña klaran, maibé VDL joga ho kalma, maibé prioridade ba prodús golu.

Jogu la’o iha minutu 42 sorte di’ak ba ekipa VDL tanba hetan oportunidade di’ak liuhosi jogadór Natercia Boavida (7) hodi fura uluk rede Maudoko nune’e lori score ba 1-0. Hosi golu ne’e mak termina minute primeira parte, maski ekipa rua ne’e lansa kontra atake ba malu maibé la prodús tan golu ruma.

Haku’ur ba segunda parte, ekipa rua lansa nafatin kontra ho atake ba malu no oportunidade monu nafatin ba VDL hodi hatama tan golu ida hosi jogadór Natercia Boavida (7) iha minutu 46 hodi dudu rezultadu ba 2-0.

Ho derrota golu rua ne’e, treinadór Maudoko Salvador Sousa hateten, jogadór sira ladún iha konsentrasaun di’ak hodi nune’e sira sofre golu rua ne’e.

“Ami nia jogadór sira la dun iha konsentrasaun di’ak mak ami lakon, maibé jogu sei naruk, iha jogu sira tuir mai ami sei esforsu an hodi manan,” Salvador Sousa hateten.

Iha sorin seluk treinadór VDL, Jeramias Baptista sente kontente tanba nia ekipa konsege manan iha jogu abertura ne’e no tuir mai sei esforsu hodi manan tan.

“Kontente loos ami nia ekipa manan, la’ós ne’e de’it ami sei esforsu para bele manan jogu sira tuir mai tanba jogu sei naruk,” nia hateten.

Jornalista : Hortencio Sanchez

Editór         : Francisco Simões

HAKEREK NO HATÁN

Please enter your comment!
Please enter your name here