Saudozu Agapito Cardoso “Mauloco’o” (l;aran). Imajen/Espesiál.

DILI, 18 agostu 2021 (TATOLI)—Saudozu Agapito Cardoso “Mauloco’o”, bainhira kontinua nia estudu iha ensinu superiór iha Bali, Indonézia saudozu envolve ativa iha movimentu klandestina hamutuk ho Timor-oan na’in-sia (9) sira seluk harii Resistencia Nacional dos Estudantes de Timor-Leste (RENETIL) iha 20 juñu 1988.

Ho nia partisipasaun iha manifestasaun pasífika hamutuk ho estudante timor-oan sira seluk, nia hetan pena, halo nia lakon nia bolsa estudu hosi Governu Indonézia.  Fila mai Timor-Leste kontinua estudu iha Universitas Timor-Timur (UNTIM) no bainhira harii Dewan Solidaritas Mahasiswa Pemuda dan Pelajar Timor-Timur (DSMPPT), saudozu hetan responsabilidade nu’udar Koordenadór Dewan Mini Manufahi.

Ho luta hirak ne’e, mak Prezidente Repúblika, Francisco Guterres Lú Olo, iha 17 agostu 2021, liuhosi Dekretu Prezidente Repúblika dekreta Estadu fó onra fúnebre no hakoi Agapito Cardoso “Mauloco’o” iha Jardim dos Herois da Pátria Metinaro, Dili, nu’udar Kombatente Libertasaun Nasionál.

Liuhusi Dekretu Prezidente Repúblika ne’ebé publika iha Jornal da Repúblika hateten Konstituisaun konsagra rekoñesimentu no valorizasaun ba rezisténsia sekulár Povu Maubere kontra dominasaun estranjeira no kontributu ema hotu-hotu ne’ebé luta ba independénsia nasionál.

Lei kona-ba Estatutu Kombatentes Libertasaun Nasionál reafirma vontade atu fó omenajen ba esforsu sira-ne’ebé manifesta hosi Kombatente Libertasaun Nasionál iha luta ba Independénsia Nasionál.

Haree ba kontribuisaun ba Luta Libertasaun Pátria, Comissão de Homenagem, Supervisão de Registos de Recursos autoriza Agapito Cardoso “Mauloco’o” iha direitu atu hetan onra fúnebre no hakoi iha “Jardim dos Herois da Pátria Díli nian iha Metinaro” nu’udar Kombatente Libertasaun Nasionál.

Biografia

Agapito Cardoso, moris iha Rotutu, iha 4 abríl 1967. Oan hosi Joaquim Cardoso no Berta Seixas. 

Saudozu Agapito Cardoso “Mauloco’o”. Imajen/Espesiál.

Iha tinan-1975 sai membru Organizasaun Popular Juventude Timor iha Manufahi no halai ba ai-laran hodi reziste hasoru okupasaun Indonézia.  Iha 1981, tanba ninia partisipasaun iha levantamentu iha Rotutu, militár Indonézia kaptura saudozu no destera família saudozu nian ba Betano durante tinan-hitu.

Bainhira kontinua nia estudu iha ensinu superiór iha Bali, Indonézia saudozu envolve ativa iha movimentu klandestina hamutuk ho Timor-oan na’in-sia (9) sira seluk harii Resistencia Nacional dos Estudantes de Timor-Leste (RENETIL) iha 20 juñu 1988.

RENETIL harii iha loron 20 fulan Junyu tinan 1988, harii hosi estudante na’in 10 nebe estuda iha Denpasar, Bali.  Estudante na’in 10 nebe hanesan fundador RENETIL nian mak: Fernando de Araújo (La’ Sama), José A.M.X. Gonçalves (Si’ak), Lucas da Costa (Lahe Mau/Rama Metan), Carlos da Silva Lopes (Freezip/Radihka Saky), Agapito Cardoso (Mau Loco), Marciano Octávio Garcia da Silva (Chury Sakar Subar), Julio Abel Ribeiro) (Tae Tudak), João de Araújo (Mau Terus), Adolfo Fontes Soares (Mau Lamas) no João Cardoso Fernandes (Mau Riba).

Iha 1989, Mau-Loco’o hamutuk ho Marciano Garcia da Silva, João Reis no Avelino Coelho tama embaixada Vaticano ho objetivu atu internasionaliza kauza Timor-Leste ninian. Hafoin Masakre Santa Cruz (12 novembru 1991), iha 19 novembru 1991, saudozu partisipa iha manifestasaun pasífika iha Jakarta-Indonézia hodi protesta atrosidade ne’ebé militár Indonézia komete.

Ho nia partisipasaun iha manifestasaun pasífika hamutuk ho estudante timor-oan sira seluk, nia hetan pena, halo nia lakon nia bolsa estudu hosi Governu Indonézia.  Fila mai Timor-Leste kontinua estudu iha Universitas Timor-Timur (UNTIM) no bainhira harii Dewan Solidaritas Mahasiswa Pemuda dan Pelajar Timor-Timur (DSMPPT), saudozu hetan responsabilidade nu’udar Koordenadór Dewan Mini Manufahi.

Mau-Loco’o husik mundu iha 15 agostu 2021, tanba moras rins ne’ebé nia sofre desde 2016 no COVID-19.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here