Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (18/08). Imajen TATOLI/Egas Cristóvão

DILI, 18 agostu 2021 (TATOLI)—Ministru Finansa, Rui Augusto Gomes, aprezenta Projetu Rezolusaun Governu iha reuniaun Konsellu Ministru (KM) ba Kriasaun Unidade Jestaun Integradu ba Projetu Dezenvolvimentu Aeroportu Internasionál Prezidente Nicolau Lobato, Comoro. 

“Unidade ne’e sei iha dependénsia direta ba Komisaun Interministeriál kona-ba negosiasaun apoiu finanseiru ba rekualifikasaun Aeroportu Internasionál Nicolau Lobato, hanesan estrutura temporária ida ba implementasaun projetu ne’ebé sei kontinua ho jestaun téknika no estratéjika sentralizada iha ezekusaun projetu, iha ninia komponente no ninia faze sira,” Ministru Prezidénsia Konsellu Ministru, Fidelis Manuel Leite Magalhães, hateten, hafoin ramata reuniaun ezekutivu, iha Palásiu Governu, kuarta ne’e.

Hafoin aprova rezolusaun ne’e, Governu sei apresia no halo aprovasaun ba tempu tuir mai liuhosi Dekretu Governu ne’ebé sei define di’ak liután ba dezenvolvimentu Aeroportu Comoro.

Governu kria ona komisaun interministeriál hamutuk ho grupu traballu hodi hala’o serbisu no analiza ba rekezitu tékniku, sosiál, ambientál, finanseiru no jurídiku ba opsaun rekualifikasaunaeroportu.

Kona-ba atu liberta rai iha área konstrusaun, daudaun ne’e ekipa téknika halo ona levantamentu ba komunidade.

Ekipa téknika liña ministériál hahú esforsu maka’as atu aselera no finaliza planu mestre hodi bele hahú konstrusaun Aeroportu Dili.

Orsamentu ba konstrusaun Aeroportu Internasionál ne’e hosi impréstimu Banku Dezenvolvimentu Aziátiku (ADB, sigla inglés) hamutuk millaun $100 no Governu mós aloka ona millaun $300, tanba konstrusaun aeroportu ne’e sei presiza millaun $480.

Antes ne’e, Governu Japaun hatudu kompromisu atu apoia orsamentu millaun $44 hodi konstrui aeroportu ba komponente lima hanesan terminál ba passajeiru, tore kontrolu, tax way (fatin impostu), access road (asesu rodovia) no fatin para aviaun.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here