Formandu hosi Canossa Vokasionál Training Center (CVTC) Covalima. Imajen/Espesiál.

DILI18 agostu 2021 (TATOLI)—Canossa Vokasionál Training Center (CVTC) Covalima, durante ne’e fó formasaun ba joven no ferik balun ne’ebé la termina estudu, nune’e bele aumente sira-nia koñesimentu.

Jestór Programa CVTC Covalima, Felisberto Araujo de Jesus. Imajen/Espesiál.

“Ami fó formasaun ba ema sira-ne’ebé la termina sirania estudu maibé sira mós hakarak hetan rekoñesimentu ruma hodi avansa ba simu sertifikadu I no II,” Jestór Programa CVTC Covalima, Felisberto Araujo de Jesus, hateten ba Agência Tatoli, via telefónika, kuarta ne’e.

Formasaun ne’e hala’o ba joven sira-ne’ebé la ramata estudu iha presekundária tanbá finanseiru la to’o no distánsia do’ok hosi eskola ne’ebé halo sira para tiha eskola, nune’e sira hakarak hetan buat ruma entaun sira mai iha CVTC hodi tuir formasaun.

“Matéria ne’ebé sira aprende iha formasaun ne’e báziku nian. Ezemplu, sira aprende ospitalidade báziku nian hanesan tein, prepara kama, bainhira sira iha kapasidade natoon, sira bele halo ida ne’e di’ak to’o fulan neen, ami rekoñese sira no fó sertifikadu ba sira,” nia dehan.

Bainhira sira ramata tuir formasauun ne’e, sira bele kontinua ba sertifikadu I no II iha área otelaria no administrasaun nian hodi bele sertifikadu nasionál hosi INDMO, maibé ne’e depende ba sira-nia hakarak no kompromisu.

“Sira ne’ebé tuir formasaun ne’e, hamutuk ema na’in97. Sira-ne’e mai hosi juventude no ferik-katuas baluun,” nia dehan.

Iha tinan ne’e, nia informa, formandu ne’ebé tuir formasaun iha CTVC hamutuk na’in42 ne’ebé kompostu hosi hosi ospitalidade na’in26 no administrasaun na’in18.

“Dadaun ne’e, aminia formasaun la’o hela, tanbá formandu no formadór sira simu ona vasina,” nia dehan.

Maske, formandu no formadór sira simu ona vasina, maibé sentru ne’e nafatin kumpre medida prevensaun COVID-19 hosi Ministériu Saúde (MS) no Organizasaun Mundiál Saúde (OMS) hodi fase liman beibeik ho sabaun, uza máskára no halo distansiamentu sosál.

Canossa Vokasionál Training Center (CVTC) estebelese iha tinan 2009, ne’ebé funda hosi Madre Sonia Sangel. Sentru formasauun ne’e harii ho objetivu atu hasa’e joven sira-nia koñesimentu iha área ospitalidade no administrasaun, atu bele kompete ba iha industria iha rai laran no rai-li’ur.

Área formasaun ne’ebé CVTC fó hanesan ospitalidade sertifikadu I, II no administrasaun sertifikadu I no II.

“Aminia formasaun ne’e, agora daudaun ba sira-ne’ebé tuir formasaun sertifikadu I no II, ramata ona sirania formasaun. Maibé tanbá sira laiha oportunidade ba servisu, entaun ami kontinua fó formasaun ho naran komplementar hodi hadi’a di’ak liután sirania kapasidade, liu-liu ba ospitalidade. Nune’e, bainhira iha oportunidade sira mós bele ba kompete iha industria atu hetan servisu,” nia dehan.

Hosi tinan 2015 to’o 2020, totál formandu sira-ne’ebé tuir formasaun no gradua hamutuk 246 no hosi númeru ne’e 113 mak hetan ona servisu iha Instituisaun Governu no Organizasaun Naun Govermentál (ONG) sira.

Totál funsionáriu no formadór iha Canossa Vocational Training Center (CVTC) Covalima hamutuk na’inlima (5) ne’ebé maihosi esperiénsia kada área.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here