Programa Nasionál Dezenvolvimentu Suku (PNDS), entrega motorizada ho marka XTZ150 hamutuk 33, ba PNDS munisípiu Viqueque, iha edifísiu munisipál Viqueque, tersa (17/08/21). Imajen Tatoli/ Vitorino Lopes da Costa.

VIQUEQUE, 17 agostu 2021 (TATOLI)—Programa Nasionál Dezenvolvimentu Suku (PNDS), entrega motorizada ho marka XTZ150 hamutuk 33, ba PNDS munisípiu Viqueque, atu fasilita ofisiál-sira bele hala’o serbisu iha terrenu.

Adiministradór munisípiu Viqueque, Januário Sores ‘Bolly’ hateten,  atividade PNDS iha tinan ne’e sei la’o makás, tanba ne’e bainhira utiliza motorizada hirak-ne’e tenke kuidadu no responsablidade.

Notísia relevante:PNDS Viqueque kapasita EJS na’in 15

“Motorizada ne’e sosa povu nian osan ne’ebé ita boot sira uza ho kuidadu. Fó hanoin mós katak, atu besik ona kampaña, labele uza motorizada ne’e,” Januário Sores ‘Bolly’ hateten iha edifísiu munisipál Viqueque, tersa ne’e.

Nune’e mós diretór PNDS munisípiu Viqueque, Estevão de Carvalho, hateten antes ne’e, funsionáriu sira  iha motorizada tuan hamutuk 25, ne’ebé sei entrega fali na patrimóniu Estadu no simu fila-fali foun, maibé ho kritéria tenke iha karta kondusaun mak bele simu, hodi halo serbisu ba dezenvolvimentu iha suku.

Diretór ne’e husu ba funsionáriu-sira atu uza motór ho kuidadu, tanba lori povu nia osan mak sosa, hodi serbisu ba povu.

“Motorizada ne’ebé munisípiu Viqueque hetan hamutuk unidade 33. Husu atu uza ho kuidadu,” diretór ne’e hateten.

Reprezentante kompañia Eastern Star Motors no  Diverse Trade, Unip, Lda,  Fernado Mesquita, haktuir distribuidór motorizada ne’e injeksi no bele uza iha vila inklui área rurál.

Funsionáriu PNDS, Alcino Fernandes, ne’ebé simu motorizada promete sei kuidadu didiak patrimóniu  Estadu no sei utiliza ba atividade serbisu PNDS.

Jornalista: Vitorino Lopes da Costa

Editór: Ciprino Colo

HAKEREK NO HATÁN

Please enter your comment!
Please enter your name here