Reprezentante JICA iha Timor-Leste, Goto Ko, asina nota entendimentu ho Prezidente BTL,E.P, Carlos Peloi dos Reis, iha salaun BTL, E.P, tersa (17/08). Imajen Tatoli/Francisco Sony

DILI, 17 agostu 2021 (TATOLI) – Ajénsia kooperasaun internasionál Japaun nian (JICA/Japan International Cooperation Agency), tersa ne’e, asina akordu servisu ho Bee Timor-Leste, Empreza Públiku (BTL,E.P).

Nota kooperasaun ne’e asina direta hosi Xefe Reprezentante JICA iha Timor-Leste, Ko Goto ho Prezidente Konsellu Administrativu no Komisaun Ezekutivu BTL,E.P,  Carlos Peloi dos Reis.

 “Kooperasaun entre Governu Japaun no Timor-Leste hahú kedas tinan 20 liubá, no JICA fó ona apoiu tékniku ba Governu Timor-Leste iha área oin-oin, inklui área bee-moos. Ho nune’e, ha’u fiar katak projetu foun hirak ne’e sei hametin liután relasaun amizade entre Governu Japaun no Timor-Leste liu-liu iha área bee-moos,” Ko Goto hateten.

Objetivu akordu ne’e hodi servisu hamutuk iha projetu Dezenvolvimentu Kapasidade ba Abastesimentu Bee-Moos Seguru no Konsiénsia ba Fase-Liman iha Pandemia COVID-19.

Akordu ida ne’e, sei implementa durante tinan ida no fulan hitu nia laran iha Timor-Leste atu haforsa kapasidade BTL,E.P. iha abastesimentu bee-moos, ijiéniku no seguru, liuhosi apoiu aprovizionamentu hodi fornese ekipamentu sira hanesan, Chlorine, Coagulant, kanu no bomba bee ba BTL, E.P.

 Akordu hanesan antes ne’e  asina ona iha  loron 14 jullu 2021, kona-ba kooperasaun ba Projetu Melloramentu ba Jestaun Abastesimentu Bee-moos iha BTL,E.P.

Liuhosi projetu ne’e, JICA sei foka komponente importante tolu, mak hanesan, destaka JICA nia peritu sira ne’ebé sei servisu hamutuk ho  BTL, E.P hodi mellora jestaun distribuisaun bee-moos, jestaun rekursu umanu, jestaun konsumidór, manutensaun no operasaun ba ekipamentu sira.

Iha akordu primeiru ne’e JICA sei fornese treinamentu intensivu iha Japaun ba tékniku BTL, E.P no prosesu aprovizionamentu ekipamentu nesesáriu sira, hanesan, kanu no kontadór sira, projetu ne’e rasik sei implementa durante tinan tolu.

Iha fatin hanesan Prezidente BTL,E.P, Carlos Peloi dos Reis, hateten akordu ne’e selebra atu parte rua bele servisu hamutuk hodi fornese bee-moos ba komunidade ho di’ak. Material hirak ne’ebé JICA haraik ba BTL, E.P ho kustu $730.000,00-resin.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here