Kondisaun estrada ba Aldeia Fatuloro, Suku Taroman, Postu Administrativu Fatululic, Munisípiu Covalima, la seguru ba movimentu transporte. Imajen Tatoli/Celestina Teles.

COVALIMA, 16 agostu 2021 (TATOLI) –Komunidade Aldeia Fatuloro, Suku Taroman,  Postu Administrativu Fatululic, Munisípiu Covalima, to’o oras ne’e, seidauk asesu estada ho kondisaun di’ak. Tanba ne’e, komunidade husu ba Governu atu bele tau atensaun no buka solusaun iha tempu sira tuir mai.

“Ami  iha Aldeia Fatuloro difisil atu lori produtu lokál ba fa’an iha merkadu lokál no nasionál tanba ami la asesu ba transporte públiku ho di’ak. Ami nia kondisaun estrada at tebetebes,” Ingrasa Abu informa  ba Agência Tatoli iha Aldeia Fatuloro, Covalima, segunda ne’e.

Maske iha tinan 2020 IGE loke ona estrada foun hosi Suku Dato Tolu liga mai iha Postu Administrativu Fohorem to’o iha Aldeia Fatuloro, maibé presiza tebes nahe ho alkatraun tanba tempu udan, rai-sira ne’ebé aterru iha  estrada udan-been sobu lori hotu ba mota laran.

Komunidade Aldeia Fatuloro nia poténsia agríkola  koto, kami, liis-mean, saburaka ho seluk-seluk tan.

Xefe Aldeia Fatuloro, Raimundo Henrique husu Governu sentrál atu bele halo reabilitasaun ba estrada hosi Suku Dato Tolu mai iha Aldeia Fatuloro atu fasilita komunidade asesu ba merkadu.

“Kondisaun estrada ne’ebé at tebes ne’e difikulta ami nia komunidade atu hetan osan hosi sira-nia produtu lokál,” nia tenik.

Molok ne’e, Diretór Servisu Munisipál Obras Públikas, Alberto Cardoso hateten, atu halo reabilitasaun estrada rurál hosi Suai Villa to’o iha Mota Tafara no reabilita estrada hosi Suku Dato Tolu  ba iha Postu Administrativu Fatululic kompañia submete ona dokumentu.

Jornalista   : Celestina Teles

Editór        : Francisco Simões

HAKEREK NO HATÁN

Please enter your comment!
Please enter your name here