Prezidente Republika, Francisco Guterres ‘Lú Olo’. Imajen TATOLI/António Gonçalves

MANUFAHI, 16 agostu 2021 (TATOLI)—Xefe Casa Sivil Prezidente Repúblika, Francsico Maria Vascolhos, konfirma Prezidente Repúblika (PR), Francisco Guterres ‘Lú Olo’ adia vizita bá munisípiu hodi halo diálogu komunitáriu, tanba ho kondisaun saúde la permite.

“Prezidente Repúblika la kansela ninia viajen mai munisipíu Manufahi, maibé sei adia de’it no tempu besik sei mai,” Xefe Casa Sivil hateten hafoin halo sorumutuk ho Autoridade munisipál sira, iha salaun administrasaun Manufahi, segunda ne’e.

Tuir Xefe Casa Sivil, planu vizita Xefe Estadu mai Manufahi ne’e feitu ona no planu ne’e halo ona desde fulan-haat liubá.

“Maibé infelismente iha sesta ne’e Prezidente  Repúblika sente isin manas oituan, maibé ohin dadeersan ha’u atu sai Prezidente hakarak mai, maibé médiku mak rekomenda ba temporáriamente Prezidente lalika halo viajen,” nia dehan.

Maski PR la halo vizita iha munisípiu ne’e, maibé hato’o hela mensajen ba povu Manufahi no fó  agradesementu ba preparasaun ne’ebé halo ona.

“Prezidente laiha intensaun atu adia vizita iha dalan klaran tanba hatene komunidade sira ninia preparasaun hodi simu nia vizita,” nia akresenta.

Nune’e, tuir planu iha tinan ida-ne’e nia laran PR sei mai vizita munisipíu Manufahi no Ainaro.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here