Bambú. Imajen/Espesiál

DILI, 16 agostu 2021 (TATOLI)–Institutu Peskiza, Dezenvolvimentu, Formasaun no Promosaun Bambú, Institutu Públiku (IPDFP, I.P) durante fulan-rua (juñu no jullu) 2021 halibur osan $200.000 liuhosi produsaun meza no kadeira ho materiál bambú.

“Durante COVID-19 iha obstákulu oituan, maibé ema sempre mai sosa produtu hanesan mobiliáriu sira, ne’ebé tinan ne’e maski ho situasaun COVID-19 maibé ladún impede ami-nia atividade no tranzasaun, tinan ne’e iha fulan-juñu no jullu ami hatama $200.000 resin ba kofre Estadu,” Diretór Ezekutivu IPDFP Babú, I.P António dos Santos de Matos, hateten, ba Agência TATOLI, iha ninia knaar fatin, Tibar, segunda ne’e.

Nune’e, Responsável institutu ne’e iha esperansa, tinan ne’e ramata bele aumenta rendimentu hodi kontribui ba reseita doméstika.

Tanba ne’e, Institutu Bambú hahú loke liras ona, ne’ebé daudaun emprezáriu ida hosi Tailándia maka investe mós iha produtu bambú no komprometidu ajuda Governu.

“Ho kooperasaun ne’ebé sei estabelese, sira sei haree ita-nia rekursu umanu no fasilidade, ne’ebé sira hakarak haree plantasaun. Iha momentu sira ne’e maka ita serbisu hamutuk hodi haruka ema ba tuir formasaun hodi hasa’e koñesementu, nune’e iha futuru la’ós foku de’it ba meza no kadeira, maibé halo mós produtu seluk,” nia akresenta.

Daudaun, funsionáriu IPDFP hamutuk na’in-60 no hosi totál ne’e barak mak serbisu kleur ona to’o tinan 10 iha institutu ne’e.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here