Xefe Casa Sivil, Francisco Maria De Vasconcelhos no komitiva vizita Grupu Haburas Maubisse kuda morangu iha postu Maubisse, segunda (16/08). Imajen/Imajen PR

AINARO, 16 agostu 2021 (TATOLI)—Koordenadór Grupu Haburas, Francisco Xavier do Rego, sente orgullu ho vizita Xefe Casa Sivil Prezidente Repúblika, Francisco Maria De Vasconcelhos, no komitiva hodi haree direita atividade grupu ne’e kuda morangu.

“Ami-nia grupu kuaze ema 10 resin no  konsege kuda morangu iha rai ektare ida, ne’ebé produsaun di’ak tebes no konsege kolleta ona,” Koordenadór Grupu hateten iha Maubisse, segunda ne’e.

Aleinde ne’e, grupu ne’e prodús ortikultura seluk hanesan mostarda, repollu, brokoli, alfase, ai-manas no seluktan, maibé merkadu ba produtu sira ne’e seidauk tuir espetativa hodi hasa’e rendimentu. 

Nune’e, nia husu ba Governu atu kontinua fó asisténsia téknika atubele kuda morangu ho kuantidade barak no kualidade di’ak atu fa’an ba merkadoria.

Grupu ne’e eziste dezde tinan 2000 no halibur uma-kain 12, ne’ebé iha tinan 2016, komesa hahú dezenvolve produsaun morangu liuhosi Programa Avansa Agrikultura, ne’ebé finansia hosi Ajénsia Estadu Unidu ba Dezenvolvimentu Internasionál (USAID, sigla inglés), ne’ebé fasilita fini morangu hosi California, Estadu Unidu Amérika (EUA) no formasaun kuda no dezenvolve produsaun morangu iha Bandung, Indonézia.

“Ami-nia grupu harii hamutuk ho komunidade sira. Ami foti ema ida hosi família ida, ne’ebé kada família ida-idak ho nia to’os rasik. Kuandu nia badinas, nia rendimentu ne’e maka’as, maibé kuandu baruk, nia rendimentu tuun,” nia akresenta.

 Morangu ne’ebé sira prodús hanesan orgániku no la uza adubu kímiku ka fabrikadu.

Hosi grupu nia to’os ho luan ektare 1,5, kada loron kolleta morangu kilograma 100, hafoin halo embalajen iha plástiku grama 200 to’o 400, ne’ebé morangu ne’ebé kolleta ona distribui tuir pedidu loja iha Dili, kada embalajen morangu ho grama 200 ho presu $1 no grama 400 ho presu $2.

Rendimentu negósiu morangu, kada fulan bele hetan to’o $1.000.

Iha tempu bailoron hanesan agora, grupu ne’e hasoru dezafiu hanesan laiha bee no kuandu udan-boot, bele estraga morangu, tanba ne’e presiza halo mahon fatin ida hodi proteje produtu hosi udan no loron manas liu.

Grupu Haburas Maubisse fó asisténsia téknika hodi hamosu grupu iha suku seluk iha Maubisse hanesan suku Aituto, Horai-ki’ik no Maulau.

“Apoiu ne’ebé ami fó ba voluntáriu. Ami prontu atu apoiu komunidade sira seluk, tanba antes ne’e hetan koñesimentu tékniku ortikultura iha Guangzhou, Xina. Ita ba tuir formasaun no ita mai fó buat foun ba komunidade no sira kontente. Ha’u orgullu tebes tanba ita transforma komunidade lubuk ida no dalaruma ita bele dehan to’os hanesan uluk katuas sira halo ne’e, agora ita halo mudansa no ita dezenvolve sai di’ak liutan,” nia subliña.

Biban ne’e, Koordenadór Grupu orgullu tanba hetan vizita hosi Reprezentante Prezidente Repúblika, Francisco Guterres ‘Lú Olo’.

“Ami agradese tanba durante ne’e ami halo buat lubuk ida, maibé ema atu apoiu ami mak laiha no ami mesak de’it mak halo. Avansa ajuda ami liuhosi ‘Programa Avansa Agrikultura’ durante tinan-haat, hahú tinan 2016 to’o 2020, maibé hafoin ne’e laiha ona apoiu,” nia hatutan.

Xefe Casa Sivil enkoraja grupu produtivu hasa’e kualidade morangu

Xefe Casa Sivil, Francisco Maria De Vasconcelhos enkoraja Grupu Haburas Maubisse atu hasa’e kualidade morangu.

“Haksolok tebes tanba ita-bo’ot sira bele halo serbisu agrikultura no ortikultura iha ektare ida resin no enkoraja atu hasa’e kualidade hodi bele fa’an iha merkadoria,” Xefe Casa Sivil hateten.

Nia dehan, hafoin fila hosi vizita ne’e sei informa ba Xefe Estadu atubele husu Governu kria kondisaun liuliu fó asisténsia téknika ba grupu produtivu ne’e.

Reprezentante Prezidénsia Repúblika ne’e agradese no apresia tebes katak iha Maubisse povu agrikultór iha duni inisiativa iha serbisu produsaun no koperativa ne’ebé di’ak tebes.

“Hau hanoin sei la’o ba beibeik hodi hetan susesu boot liután ba ita-b’ot sira nia-an. Ha’u hanoin Governu liuhosi Sekretaria Estadu kooperativa iha ona planu di’ak,” nia akresenta.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here