Diresaun Servisu Edukasaun Munisipál Baucau halo restruturasaun Sentru Aprendizajen Komunitária Kreativa Baucau, iha Villa nova, segunda (16/06). Imajen TATOLI/Natalino Belo

BAUCAU, 16 agostu 2021 (TATOLI)—Diresaun Servisu Edukasaun Munisipál Baucau (DSEMB) halo restruturasaun Sentru Aprendizajen Komunitária Kreativa Baucau ba períodu 2021 to’o 2023, nu’udar planu polítika Governu ba komunidade, ne’ebé antes ne’e hariii ona iha tinan 2015, maibé paradu iha tinan 2018 to’o 2021.

Ho nune’e, Diretór Servisu Edukasaun Munisipál Baucau, Augusto Hornai Ximenes, enkoraja estrutura foun atu masimiza serbisu.

Diretór Servisu Edukasaun Munisipál Baucau, Augusto Hornai Ximenes. Imajen TATOLI/Natalino Belo

“Ohin ami restrutura fali komisaun legizlasaun no komisaun ezekutivu, nune’e hala’o fali atividade sentru. Ha’u husu kolega sira-nia kooperasaun atu kontribui tomak ihae strutura foun ne’ebé estabelese ona, nune’e bele masimiza serbisu durante períodu 2021 to’o 2023,” Diretór Edukasaun Baucau, hateten, iha Villa nova, segunda ne’e.

Diresaun Servisu Munisipál iha inisiativa atu restrutura fali estrutura ne’ebé paradu, tanba kuaze tinan tolu la funsiona tanba empase polítika no uza orsamentu duodésimu ne’ebé halo atividade paradu.

Ho nune’e, Diretór Servisu Edukasaun Munisipál Baucau, iha esperansa sentru ne’e bele responde planu sira.

“Espera estrutura foun bele fó resposta planu hosi ministériu no autoridade munisipál tanba  Sentru Aprendizajen Komunitária hanesan planu integradu, katak iha futuru postu ida sei estabelese sentru ida-atu, ho nune’e bele akumula Joven sira ne’ebé laiha oportunidade asesu edukasaun formál no la konsege finaliza edukasaun formál,” nia subliña.

Tuir Responsável ne’e, bainhira realiza ona atividade, joven ne’ebé la konsege finaliza estudu nível ensinu bele aproveita iha programa ekivalánsia, tanba kuandu ramata iha direitu hanesan ho nível ensinu formál no bele asesu ba universidade.

Atividade Sentru Aprendizajen Komunitária Kreativa Baucau iha matadalan tolu hanesan área aprendizajen liuhosi programa ekivalénsia, programa literasia no prátika vokasional, área atividade negósiu no ikus mak atividade dezenvolvementu komunitária hanesan ambiente, kulturál, saúde no turizmu.

Munisípiu Baucau daudaun ne’e foin estabelese programa ekivalénsia liuhosi Sentru Aprendizajen Komunitária Kreativa Baucau hamutuk tolu iha suku Buibau, Buruma no Bahu.

Baze fundamentál Konstitusaun iha artigu 59 parágrafu I to’o V kona-ba ema hotu nia direitu atu asesu ba edukasaun, enkuantu Dekretu-Lei númeru 3/2016 artigu 7 pontu i kona-ba kompeténsia munisipál iha área edukasaun, programa sira hanesan eskola pre-eskolar, ensinu báziku espesiál, programa merenda eskolar, ensinu rekorente espesiál, programa analfabetizasaun, Sentru Aprendizajen Komunitária Kreativa no sentru kulturál.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here