Autoridade lokál iha Munisípiu Bobonaro, deklara prontu apoia hasae kobertura kampaña interministeriál ba vasina kontra COVID-19. Imajen Tatoli/Sérgio da Cruz

BOBONARO, 14 agostu 2021 (TATOLI)-Autoridade lokál iha Munisípiu Bobonaro, deklara prontu apoia hasae kobertura kampaña interministeriál ba vasina kontra COVID-19 hosi nivel munisípiu to’o aldeia remotas.

Xefe Suku Kota-Boot, Postu Administrativu Bobonaro, Munisípiu Bobonaro, Miguel Gonçalves, hateten iha situasaun pandemia Covid-19, autoridade lokál mós iha papél importante atu kontribui luta kombate Covid-19 iha Timor-Leste tanba ne’e nia-parte prontu kolabora no mobiliza komunidade kontribui hasa’e taxa partisipasaun komunidade nian iha programa vasina nasionál.

“Loro-loron  ami nia xefe aldeia sira fahe nafatin informasaun ba komunidade, nune’e sira bele mai hotu simu vasina,” Miguel Gonçalves informa ba Agência Tatoli iha Maliana, sábadu ne’e.

Nia hateten, vasina mak dalan úniku atu próteze an hosi propagasaun peste letál Covid-19 ho nune’e nia apela ba komunidade labele ta’uk hakbesik mai simu vasina no labele rona lia boatu ka informasaun falsu sira katak vasina ne’e atu oho ema.

Xefe Suku Purugua, Postu Administrativu Cailaco, Claudino Bere Pelu, hateten nia populasaun balu simu ona vasina, maibé númeru partisipasaun sei mínimu, tanba ne’e sira halo esforsu atu kolabora ho komunidade hasae taxa partisipasaun iha kampaña nasionál vasinasaun.

Taxa kobertura vasinasaun iha Munisípiu Bobonaru iha fulan kotuk ninia persentajen foin atinje 21,8% , nune’e Primeiru-Ministru Taur Matan Ruak, liuhosi programa kampaña interministeriál vasina Covid-19 orienta Ministru Defeza, Filomenu Paixão de Jesus, halo sosializasaun iha postu administrativu hitu iha Bobonaro atu hasae taxa partisipasaun komunidade nian iha  vasina.

Tuir dadus hosi  Ministériu Saúde to’o loron 14 agostu ne’e, totál populasaun Bobonaro ne’ebé simu ona vasina 35,2% ho total ema 19.979. Totál enumerasaun alvu populasaun Bobonaro hosi idade 18 ba leten ne’ebé atu simu vasina na’in-56,744.

Jornalista   : Sérgio da Cruz

Editor        : Francisco Simões

 

HAKEREK NO HATÁN

Please enter your comment!
Please enter your name here