Komunidade kontinua simu vasina AstraZeneca iha Sentru Saúde Comoro, Dili, segunda (09/08/21). Imajen Tatoli/António Gonçalves.

DILI, 13 agostu 2021 (TATOLI)—Ema na’in 773 ne’ebé simu vasina doze daruak iha Hospitál Nasionál Guido Valadares (HNGV), hahú hosi 10 to’o 15 juñu 2021, tenke simu fali vasina tanba iha verifikasaun hatudu katak, vasina AstraZeneca ne’ebé sira simu inválidu, kauza hosi mudansa temperatura zelera tun ba 4 to’o 10cc.

Diretór ezekutivu HNGV, Alito Soares, esplika mudansa temperatura zelera mak halo vasina sai zelu no ekipa hato’o kedan ba ekipa nasionál imunizasaun hanesan Organziasaun Mundiál Saúde OMS no seluk tan hodi haree no avalia vasina ne’e.

Notísia relevante:PM orienta parte kompetente investiga vasina AstraZeneca aat iha HNGV

“Entaun sira haree duni iha vasina sai zelu no momentu ne’ebá sira rekomenda kedan  tenki rai ketak vasina. Sira mós fornese kedan zelera foun ida ba HNGV atu rai vasina sira-ne’e,’’Alito Soares hateten ba jornalista-sira iha HNGV, sesta ne’e.

Rekomendasaun hosi Organziasaun Mundiál Saúde ba Minitériu Saúde no HNGV katak, vasina ne’ebé mak sai zelu ne’e laiha ona  efikasia atu forma  ema nia imunidade.

Tanba ne’e, OMS sujere fali ba Ministériu Saúde katak, tenki vasina fila-fali ema sira ne’ebé hetan ona vasina ne’ebé laiha efikasia.

Tuir dadus HNGV, totál ema ne’ebé hetan vasina iha momentu ne’ebá hamutuk 773, kompostu hosi  profisionál saúde,  família profisionál saúde no mós  parseiru sira hanesan  institute Sao João de Deus.

Antes ne’e Minsitra Saúde (MS), Odete Maria Freitas Belo rekoñese katak, Minstériu identifika ema na’in 773 mak simu vasina laiha efikasia.

Tanba ne’e parte Ministériu mós deside ona atu ema hirak ne’e bele simu fila fali vasina doze foun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here