Ministru Edukusan Joventude no Desportu (MEJD), Armindo Maia no Deputy Embaisadora Autrália iha Timor-Leste, Suzy Wilson-Uilelea, vijita fatin empresora materia eskolár, sesta (13/08). Imajen Tatoli/Francisco Sony

DILI, 13 agostu 2021 (TATOLI)- Ministru Edukasaun, Juventude no Desportu (MEJD), Armindo Maia, sesta ne’e, halo lansamentu distribuisaun rezumu matéria ezame nasionál nian ba ensinu báziku no sekundária ba Diretór Edukasaun Munisípiu sira.

Ministru Armindo Maia hateten, rezumu disiplina refere atu ajuda estudante sira hahú hosi ensinu primeiru siklu to’o terseiru siklu no ensinu sekundáriu sira tanba durante serka sanitária no konfinamentu obrigatóriu estudante maioria la asesu ba rede internet, osan laiha atu sosa telefone android ka smartphone no balu televizaun laiha, nune’e MEJD buka meiu rezolve problema sira-ne’e mak prodús rezumu sira ne’e atu ajuda estudante-sira, nune’e bele hala’o ensinu aprendizajen ne’ebé bele efetivu liuhosi matéria ne’ebé prepara ona.

“Inisiativa ne’e importante tebes tanba Unidade Sentru Impresaun bele rezumu matéria eskola no kaderneta fahe ba eskola sira,” Armindo Maia hateten liuhosi nia diskursu bainhira halo lansamentu rezumu matéria iha Sentru Imprime Comoro, Dili.

Koordenadór Unidade Kurríkulu Nasionál, Pedro Gonçalves hateten, objetivu lansamentu rezumu disiplina no kaderneta ba eskola sira tanba pandemia COVID-19 fó impaktu ba ema ida-idak nia-moris iha mundu tomak, inklui iha Timor-Leste implementasaun Estadu Emerjénsia ne’ebé ezije MEJD tenke regula funsionamentu eskola tuir kontestu emerjénsia, situasaun ida ne’e afeta labarik sira-nia aprendizajen partikularmente labarik vulneravel sira.

Tuir nia haree, situasaun ne’e halo mós alunu sira lakon oportunidade ba aprendizajen sira tanba laiha oportunidade ba hetan apoiu hosi profesór sira no inan-aman sira, maske kontinua halo esforsu atu disponibiliza oportunidade aprendizajen utiliza multi-kanál ba aprendizajen distánsia hanesan programa eskola ba uma, tele-eskola ba uma liuhosi televizaun, online no halo distribuisaun materiál ba grupu marjinalizadu, maibé aprendizajen iha uma seidauk la’o ho másimu.

Nia esplika objetivu ba elaborasaun rezumu ne’ebé halo lansamentu ne’e atu implementa despaixu Ministeriál númeru 22/GM-MEJD/VJ 2021, ne’ebé aprova regra relativa aplikasaun modalidade ba ensinu distánsia, atu asegura estudante sira hosi nivel Ensinu Báziku to’o Sekundáriu hetan oportunidade atu kontinua aprende iha uma durante tempu pandemia, no rezumu sira ne’e, hanesan meiu prinsipál hodi kontinua garante kontinuidade aprendizajen hanesan meiu komplementár ba aproximasaun sira seluk.

Estratéjia nu’udar define ona hosi Despaixu Ministeriál númeru 028/GM-MEJD/V/2021, katak kolaborasaun no partisipasaun hosi entidade relevante sira liu-liu lideransa eskola no mós profesór sira
importante tebes atu garante alunu sira-nia aproveitamentu ne’ebé di’ak liután.

MEJD liuhusi Unidade Kurríkulu Nasional (UCN, sigla portugés) no diresaun relevante sira hamutuk ho profesór eskola sira hodi elabora konteúdu matéria rezumu halo produsaun no distribuisaun ba eskola sira no mós partisipasaun inan-aman no motivadór iha implementasaun, nune’e lideransa eskola halo sira-nia papél funsaun di’ak liután hosi eskola ba uma hodi apoiu alunu sira iha konteúdu disiplina rezumu ba disiplina sira ne’ebé tama iha ezame nasionál.

Koordenadór Sentru Impresaun, Helder Aparácio Guterres, hateten matéria rezumu ne’ebé unidade impresaun konsege imprime matéria ba Ensinu báziku 3° siklu 9 ano ho totál 125.000 kópia hosi matéria lima, matemátika, inglés, portugés, istória jeografia, siénsia fízika naturaís, nia pájina hamutuk 32 no Ensinu sekundáriu 12 ano ho totál hamutuk 56.000 kópia hosi matéria 10, hanesan, portugés, inglés, biolojia, fízika, matemátika, kímika, ekonomia no métodu kuantitativu, jeografia, istória, sosiolojia ho pájina 80 .

“Ami mós halo ona pakotementu atu fasilita distribuisaun ba munisípiu 12 inklui Rejiaun Administrativa Espesiál Oé-Cusse Ambeno (RAEOA), no rekursu materiál ne’ebé uza ba matéria rezumu refere ho nia kustu totál $41.671.62, no matéria ne’ebé halo rezumu hetan kontribuisaun hosi parseiru Partnership For Human Development no Plan Internasionál,” nia dehan.

Diretór Edukasaun Munisípiu Viqueque, Emidio Amaral hateten, nia parte agradese tebes ba Governu liuhosi MEJD tanba iha sitasaun COVID-19 ida-ne’e MEJD iha inisiativa imprime rezumu matéria ba estudante sira.

“Ida ne’e sei ajuda, no matéria sira ne’e ita sei fahe ba estudante sira nune’e sira bele prepara aan hodi hein desizaun hosi Governu bainhira halo ezame nasionál karik sira mós preparadu oan, tanba ita hotu hatene katak mosu eskola hotu paradu no ezame trimestre I, II, ami hala’o ona entaun rezumu ida ne’e ajuda tan estudante sira,” nia dehan.

Jornalista   : Arminda Fonseca

Editór        : Francisco Simões

 

HAKEREK NO HATÁN

Please enter your comment!
Please enter your name here