Bandeira Timor-Leste no Cuba. Imajen Tatoli/Francisco Sony

DILI, 13 agostu 2021 (TATOLI) –Prezidente Repúblika periodu 2007-2012, José Ramos Horta, reiteira pozisaun  Timor-Leste nian dezde prinsípiu kontra  embargo ekonómika Estadus Unidus Amerika (EUA)  ba Cuba.

Prezidente Repúblika periodu 2012-2017, José Ramos Horta. Imajen Tatoli/Francisco Sony

José Ramos Horta hato’o deklarasaun ne’e bainhira partisipa iha serimónia aniversáriu lider nasionál Cuba, Fidel Castro nian ne’ebé embaixada Cuba iha Timor-Leste selebra iha Dili, sesta kalan ne’e.

Serimónia ne’e  organiza hosi embaixada Cuba iha Dili no Asosiasaun Amizade Timor-Leste ho Cuba ne’ebé forma hosi estudante timoroan hirak ne’ebé antes ne’e ba hasai sira nia kursu medisina iha Cuba.

“Polítika Timor-Leste nian hahú kedan iha tinan restaurasaun independénsia  iha 20 maiu 2002 la muda hosi Prezidente Repúblika dala hira Primeiru-Ministru dala hira, sei la muda kontra embargo ekonómika hosi EUA ba Cuba,” Laureadu Nobel ba Pás nian ne’e afirma tan.

Pozisaun Timor -Leste nian ne’e hanesan polítika nasionál. Maski nune’e, EUA komprende Timor-Leste nia pozisaun sei la fó impaktu ba relasaun  Timor-Leste ho EUA.

“Ami sempre ko’alia ba Amerika, buat hotu ami konkorda, maibé iha pontu ida-ne’e ami labele konkorda ho imi, iha pontu ida ne’e Timor -Leste vota kontra embargo blokeia ekonomia ba Cuba,” Horta haktuir.

Seketráriu Embaixadór Cuba iha Timor-Leste, José Ernesto. Imajen Tatoli/Francisco Sony

Iha fatin hanesan Sekretáriu Embaixada Cuba iha Timor-Leste, José Ernesto hateten,  orgullu ho solidariedade ne’ebé boot tebes ba povu Cuba no selebra aniversáriu Fidel Castro nian.

“Cuba kontente no orgullu tebes ba Timor-Leste nia apoiu solidariedade ne’e, liu-liu imi nia solidariedade hodi kontra embargo ekonomia ne’ebé Amerika halo ba ami,” nia tenik.

Timor-Leste ho Cuba kontinua hametin liután lasu amizade hodi ajuda Timor -Leste nia prosesu dezenvolvimentu liu-liu iha area saúde nian.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here