Sekretáriu Estadu Kooperativa, Elizário Ferreira, hasai foto hamutuk ho entidade relevante partisipa direta iha implementasaun peograma Cesta Bázika, iha munisípiu Aileu, iha salaun Administrasaun, sesta (13/08). Imajen TATOLI/Antónia Gusmão

AILEU, 13 agostu 2021 (TATOLI)Governu liuhosi Sekretaria Estadu Kooperativa (SEKoop) enserra distribuisaun Cesta Bázika iha munisípiu Aileu no fahe sertifikadu apresiasaun ba autoridade lokál, seguransa no empreza ne’ebé partisipa iha programa ne’e.

Sekretáriu Estadu Kooperativa, Elizário Ferreira, agradese ba autoridade munisipál, postu no suku, autoridade seguransa no empreza fornesedór tanba envolve direta no esforsu hodi programa ne’e ramata ho susesu.

Sekretáriu Estadu Kooperativa, Elizário Ferreira, entrega sertifikadu apresiasaun ba entidade relevante partisipa direta iha implementasaun Cesta Bázika iha munisípiu Aileu, sesta (13/08). Imajen TATOLI/Antónia Gusmão

“Kona-ba reklamante ba SEKoop laiha ona, tanba ne’e ami entrega direta ba Ministériu Administrasaun Estatál (MAE) no Ministériu Turizmu, Komérsiu no Indústria (MTKI) tanba iha ha’u-nia parte, empreza sira responsabiliza direta ba lista adisionál, tanba ne’e kontribuisaun empreza boot tebes ba área ne’e,” Sekretáriu Estadu hateten iha ámbitu seremónia enserramentu programa, iha salaun Administrasaun munisipál, sesta ne’e.

Tuir governante ne’e, reklamante sira ne’ebé iha Aileu, la’ós empreza sira mak lakohi fó maibé aldeia mak la oferese lista.

SEKoop responsabiliza distribuisaun Cesta Bázika iha munisípiu Ainaro, Aileu, Manufahi, Covalima, Liquiçá, Manatuto no Lautém, ba ema hamutuk 432.592, hosi uma-kain 70.000 resin.

Nune’e, Sekretáriu Estadu komprometidu, la’ós de’it ba programa Cesta Bázika, maibé Governu nafatin sosa komunidade nia produtu hodi oferese ba programa merenda eskolár, ne’ebé sei implementa direta hosi edukasaun munisipál.

Tanba ne’e, SEKoop husu ba povu agrikultór atu kontinua prodús produtu agríkola.

Iha biban hanesan, Adjuntu Administradór Aileu, Feliz Maria de Oliveira, lori povu Aileu nia naran, agradese ba Governu ne’ebé foti desizaun importante hodi fó apoiu ba ninia povu ne’ebé hasoru difikuldade durante implementasaun Estadu Emerjénsia.

“Hein katak Governu ho kapasidade finanseiru hodi bele tulun nafatin sidadaun sai hosi situasaun COVID-19, ami-nia esperansa nafatin ba Governu sentrál liuhosi SEKoop no Ministériu Koordenadór Asuntu Ekonómiku (MKAE), hosi nafatin fó apoia, kore povu hosi situasaun defísil,” Adjuntu Administradór dehan.

Nune’e mós, Diretór Empreza SERAMOR Lda, Raul Lemos, orgullu no apresia ba Governu tanba iha situasaun pandemia, iha inisiativa di’ak hodi ajuda povu ho programa rekuperasaun ekonómika liuhosi programa Cesta Bázika.

“Ita hatene katak programa ne’e hala’o iha tempu ne’ebé limitadu tebes, ho kondisaun emprezáriu no povu hotu susar. Maski nune’e, hanesan timor-oan buka kolabora nafatin ho Governu atubele responde ba situasaun sira-ne’e atubele tulun família no povu ein jerál,”emprezáriu timor-oan ne’e tenik.

Nia konsidera, programa kurtu prazu ne’e bele lori benefísiu ba entidade hotu iha situasaun atuál ne’ebé halo empreza menus rendimentu no povu menus ai-han.

“Orgullu boot ida nu’udar timor-oan iha Timór laran, tanba ho situasaun kalamidade foun ne’e, ita-nia Governu iha opsaun ida seguru tebes hodi ajuda ita tuir Governu nia kbiit liuhosi programa Cesta Bázika, ne’ebé bele tulun komunidade asesu ba ai-han iha situasaun difisil,” nia hatutan.

Nu’udar emprezáriu, nia nota katak programa ne’e di’ak tanba bele benefisia povu tomak no motiva agrikultór sira hodi prodús barak liután.

“Ami nu’udar empreza fornesedór, dalaruma hetan krítika hosi komunidade, tanba produtu ne’ebé mensiona iha Cesta Bázika laran laiha no dala balun mosu konfuzaun iha kuantidade produtu ne’ebé la tuir valor $50 ba kada benefisiáriu. Ho onestu, ami rekoñese frakeza ne’e no agradese ba benefisiáriu sira-nia krítika konstrutivu bele fó hanoin nafatin ami atu hadi’a atendimentu loron ba loron iha implementasaun programa ne’e,” nia dehan.

Biban ne’e, Raul Lemos hato’o apresiasaun boot ba Governu no komunidade Aileu ne’ebé fó fiar ona ba empreza hodi sai fornesedór nesesidade bázika.

Benefisiáriu Cesta Bázika iha Aileu hamutuk 56.919 no reklamante 191, ho totál populasaun tomak iha rejiaun ne’e hamutuk 15.249.

Aileu kompostu hosi postu administrativu haat Aileu vila, Liquidoe, Laulara, Remixio, ho total suku sia hanesan Açumanu, Liurai, Tulataqueu, Faturasa, Fadabloco, Hautoho, Maumeta, no Fahisoi.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here