UNICEF serbisu hamutuk ho Uniaun Europeia no Ajénsia Nasoins Unidas iha UE-ONU Inisiativa Spotlight nia okos apoia eskola sira no MEJD atu bolu konsiénsia no involve adolexente sira no labarik sira atu serbisu hodi atinje eskola no ambiente ida ne’ebé mak livre hosi violénsia. Imajen/UNICEF

DILI, 12 agostu 2021 (TATOLI)-Fundu Nasaun Unida ba Infánsia (UNICEF) no Uniaun Europeia (UE), kinta ne’e,  entrega  ekipamentu eletróniku ba Ministériu Edukasaun, Juventude no Desportu (MEJD) hodi apoiu ba eskola sira iha territóriu nasionál.

Ekipamentu eletróniku ka projetu asesória ne’ebé entrega ba MEJD mak  hanesan projetór 52, United Parcel Service (UPS) 52 no  pen drives 52. Ekipamentu refere liuhosi programa “Inisiativa Spotlight” ne’ebé Uniaun Europeia  hamutuk ho Nasoins Unidas ne’ebé halo parseria ho UNFPA, UN Women, UNICEF apoiu hela MEJD hodi  dezenvolve no implementasaun programa sira kona-ba prevensaun violénsia iha eskola, atu nune’e estudante hotu-hotu sente seguru iha eskola hodi aprende abilidade ne’ebé presiza hodi dezenvolve relasaun saudavel.

“Atu asegura poténsia joven sira hetan ambiente eskola nian ne’ebé livre hosi violénsia no hetan ferramenta empatia, hodi afirma hikas fali, la halo diskriminasaun, mak ami ajuda sira atu sai adultu ne’ebé sei respeita sira-nia parseiru, sira nia oan no ema seluk, no sira ne’ebé sei kontribui ba nasaun ida ne’ebé pasifika,” Adjuntu Reprezentativu iha Ezersísiu hosi UNICEF iha Timor-Leste, Emmanuelle Collett hateten liuhosi nia diskursu bainhira entrega ekipamentu eletróniku ba MEJD iha salaun Ministériu Edukasaun, Vila-Verde, Dili.

Xefe Kooperasaun Delegasaun Uniaun Europeia iha Timor-Leste, Ramón Reigado hateten, ekipamentu ne’ebé sira entrega ba MEJD sei ajuda atu kombate estereótipu jéneru nian no fó ba foin-sa’e sira abilidade moris ne’ebé sira presiza atu hetan susesu iha sosiedade ohin loron.

“Violénsia kontra feto no labarik feto sira ne’e, estraga ona sira-nia moris, no ida ne’e tenke para ona, tanba ne’e atu hapara mak ho inisiativa apoiu ekipamentu sira ne’e hodi muda labarik feto no mane sira-nia moris ba di’ak,” nia dehan.

Ministériu Edukasaun Juventude no Desportu, Armindo Maia agradese tebes ba ekipamentu sira ne’ebé apoiu hosi parseiru sira, tanba apoiu sira ne’e ajuda tebes estudante no profesór-sira hanesan halo diskusaun nune’e ikus bele halakon violénsia iha eskola, uma no komunidade.

“Ita dedikadu tebes atu halakon violénsia, no klase sai nu’udar fatin ida ne’ebé importante atu garante katak ida-ne’e hahú, nune’e ekipamentu sira ne’ebé ita hetan sei fahe ba eskola hamutuk 51 iha Timor laran tomak no sei utiliza atu hatudu vídeo, aprezentasaun, imajen no konteúdu internet hodi motiva diskusaun kona-ba prevensaun violénsia,” Armindo Maia hateten.

UNICEF sei dezenvolve mós rekursu ensinu dijitál lubuk ida ba alunu no profesór sira ne’ebé sei apoia integrasaun ba abilidade moris nian, igualdade jéneru, direitu umanu no edukasaun pás nian iha siklu foun tolu ne’e ne’ebé oras ne ‘e daudaun dezenvolve hela hosi MEJD ho apoiu hosi UNICEF.

Kontextu Inisiativa Spotlight ONU nian iha Timor-Leste hahú ona iha  2020 no sei iha durasaun tinan tolu. Ida-nee buka atu asegura katak feto no labarik-feto hotu moris iha sosiedade ida ne’ebé seguru no inkluzivu, livre hosi violénsia no diskriminasaun.

Implementasaun Inisiativa Spotlight iha Timor-Leste lidera hosi ajénsia ONU nain hamutuk lima, maka hanesan UN Women, UNFPA, UNDP, UNICEF ho ILO  ho foku ida atu hatán ba violénsia parseiru íntimu no violénsia doméstika, no mós violénsia kontra labarik no adolexente sira.

Jornalista   : Arminda Fonseca

Editór         : Francisco Simões

 

HAKEREK NO HATÁN

Please enter your comment!
Please enter your name here