Rekerente hamutuk ho família sobu ona lutu ba rai konstrusaun edifísiu PNTL iha Caicoli, Dili, kinta (12/08/21). Imajen Tatoli/Nelson de Sousa.

DILI, 12 agostu 2021 (TATOLI)—Tribunál Distritál Dili (TDD), restitui ona rai ba rekerente Sebastião da Silva, ne’ebé antes ne’e hetan despezu administrativu, ba konstrusaun edifísiu foun kuartel jerál Komandu Polísia Nasionál Timor-Leste (PNTL), iha Caicoli, munisípiu Dili.

“Tribunál realiza providénsia kautelár provizóriu, hodi restitui pose rai ba rekerente ne’ebé iha direitu tomak, atu uza ba atividade saida de’it,” Advogadu privadu, Júlio da Silva, hateten ba jornalista-sira iha Caicoli, kinta ne’e.

Notísia relevante:TDD restitui rai konstrusaun edifísiu PNTL ba rekerente

Parte advogadu mós sei kumpre prazu Tribunál-nian durante loron sanulu, hodi hatama asaun prinsipál  atu aprezenta  dokumentu komprovativu iha sertifikadu, ne’ebé atribui hosi Ministériu Justisa (MJ) liuhosi Diresaun Nasionál Terras no Propriedade (DNTP) no pose proprietáriu rekerente, desde tinan 1922 nu’udár rai eransa.

Asaun prinisipál ne’e maka, Tribunál sei halo fila-fali julgamentu normál hodi bele deside prova-sira hotu-hotu atu hatene na’in loloos rai ne’e  Estadu ka rekerente.

Iha asaun prinsipál ne’e, nia dehan, hakarak hetan uluk direitu propriedade rai no bainhira Tribunál deside ona katak, rekerente nu’udár proprietáriu rai ne’ebé iha disputa, posibilidade seluk sei husu indemizasaun sivíl saida mak prejuizu hosi aktu despezu durante akontese.

Nune’e mós Koordenador Nasionál rede ba rai, Hortencio Pedro Vieira, agradese ba ekipa no advogadu hosi rede ba rai durante ne’e halo esforsu makas hodi halo advokasia, defende povu nia direitu ho rezultadu Tribunál deside ona provizóriu pose rai fó fila-fali ba komunidade, hodi hein prosesu tuir-mai.

Nia dehan, aktu Tribunál fó duni lisaun ba Estadu bainhira deside buat ruma tenke halo konsulta didi’ak, atu haree ba legalidade sira ne’ebé iha, hodi halo analiza kle’an molok foti desizaun, katak ema hotu iha lei nia okos.

Sebastião da Silva, sente kontente tanba bele foti hikas nia rai ne’ebé antes ne’e rekeridu (Estadu) foti ho despezu ne’ebé antes ne’e la’o  estraga ai-horis ne’ebé kuda ona hanesan nuu, hudi, has no seluk tan.

Iha realizasaun providénsia kautelár hodi restitui pose rai provizóriu ba rekerente ne’e, marka mós prezensa hosi ofisiál justisa hosi TDD, hodi entrega karta Tribunál nian ba rekerente.

Hafoin ne’e, rekerente hamutuk ho  família  sobu kedan kalén ne’ebé mak antes ne’e iha despezu halo lutu haleu ba rai maizamenus ho medida luan mentru ualu no naruk ho metru 45.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here