Prezidente Autoridade RAEOA, Arsénio Paixa Bano, hatuur fatuk-inan ba konstrusaun eskola iha suku Usitasae, Sub-rejiaun Oesilo. Imajen Tatoli/ Abílio Elo Nini

OÉ-CUSSE, 12 agostu 2021 (TATOLI)-Prezidente Autoridade Rejiaun Administrativa Espesiál Oé-Cusse Ambeno (PA-RAEOA), Arsénio Paixão Bano, kinta ne’e, hatuur fatuk-inan ba projetu konstrusaun ba eskola foun hamutuk unidade haat  no iha sub-rejiaun Oésilo harii unidade rua.

Notísia Relevante : Autoridade RAEOA hatuur fatuk-inan ba konstrusaun eskola rua iha Pasabe

Konstrusaun eskola sira-ne’e hanesan, iha sub-rejiaun Oésilo, suku Usitasae, harii Eskola Báziku Filiál (EBF) Buqui konstrui hosi empreza Molo unipesoál, Lda, ho valór kontratu $86,733,47 no harii Eskola Bázika Sentrál (EBC, sigla portugés) konstrui hosi empreza Sunilake unipesoál, Lda ho valór kontratu $60,497,26.

Iha sub-rejiaun Pante Makasar, suku Costa harii Eskola Pre-Eskolár (EPE), konstrui hosi empreza Elbenite unipesoál, Lda ho valór kontratu $73,332,45, no iha  sub-rejiaun Nitibe iha suku Ban-Afi harii Eskola Bázika Sentrál (EBC,sigla portugés) konstrui hosi empreza Neon-Bahan Unipesoál,Lda ho valór kontratu $63,842,03.

Prezidente Autoridade RAEOA, Arsénio Paixão Bano, husu ba empreza sira hamutuk ho autoridade lokál haree obra sira-ne’e, servisu ho responsabilidade ho garante kualidade obra.

“Iha semana ne’e, autoridade sei lansa konstrusaun eskola foun 14 iha Oé-Cusse, autoridade nia intensaun prepara fasilidade edukasaun ho kualidade  ba oan sira nia futuru tanba tinan ida ne’e autoridade sei harii eskola 20 resin di’ak ba Oé-Cusse, kontente ba ita hotu,” Arsénio Bano hateten iha serimónia hatuur fatuk-inan iha EBC Tasaebeno, suku Usitasae.

Xefe suku Usitasae sub-rejiaun Oésilo, Tomas Ulan Colo, agradese ba autoridade RAEOA tanba rezolve ona setór edukasaun iha suku laran, nune’e estudante bele asesu eskola besik.

 Nia espera iha futuru autoridade kontinua loke tan fasilidade saúde tanba iha suku Usitasae iha aldeia tolu ne’ebé hela dook hosi fasilidade saúde.

Adjuntu Diretór EBC Tasaebeno, Domingos Ase,  agradese tanba autoridade komesa rezolve ona preokupasaun komunidade, hanesan bee-moos, edukasaun inklui harii ona fasilidade saúde hanesan kuarentena iha sub-rejionál sira. Tanba ne’e nia husu atu tau matan nafatin ba edukasaun nune’e bele apoia tan fasilidade hanesan meza, kadeira, no komputadór.

Jornalista   : Abílio Elo Nini
Editór        : Francisco Simões

HAKEREK NO HATÁN

Please enter your comment!
Please enter your name here