Jestór Sub-Rejiaun Oésilo, Domingos Marques. Imajen Tatoli/Abilio Elo Nini

OÉ-CUSSE, 12 agostu 2021 (TATOLI)-Jestór sub-rejiaun Oésilo, Rejiaun Administrativu Espesiál Oé-Cusse Ambeno (RAEOA), Domingos Marques, sujere ba Governu aumenta orsamentu ba Programa Nasionál Dezenvolvimentu Suku (PNDS) nune’e bele korresponde nesesidade populasaun sira-nian kona-ba infraestrutura bázika.

Notísia Relevante : Iha Pasabe, PNDS implementa obra lima korresponde ba nesesidade komunidade

Domingos Marques, konsidera atividade PNDS iha sub-rejiaun Oésilo iha suku tolu; suku Usitaqueno, Usitasae no Bobometo, benefisia direta ba povu.

Iha suku Usitaqueno, PNDS loke estrada foun ho estrada rabat-beton, iha Usitasae kanalizasaun bee-moos iha aldeia Buqui, no iha suku Bobometo loke perfurasaun bee-moos iha aldeia Oébaha, bairru Tua-Peno, maibé to’o agora seidauk funsiona tanba mákina perfurasaun aat, inklui projetu reabilitasaun eskola ida iha aldeia Quibiselo.

“Ha’u nia suku luan tebe-tebes, iha aldeia hamutuk 13, maibé aldeia barak seidauk hetan programa ne’e tanba nia orsamentu ki’ik. Ami sujere ba Governu ba oin bele aumenta tan orsamentu ba PNDS hodi ajuda hadi’a infraestrutura bázika iha suku sira remotas,” Domingos Marques, informa ba Agência Tatoli, foin lalais ne’e.

Kona-ba kooperasaun nian, Jestór Oésilo hateten, la’o ladún di’ak tantu hosi suku no sub-rejiaun ninian, tanba molok PNDS atu konstrui projetu ruma iha baze, laiha koñesimentu ka sujestaun hosi autoridade lokál kona-ba programa saida mak atu konstrui iha suku no aldeia sira.

Nu’udár autoridade lokál iha sub-rejiaun Oésilo, nia informa ba komunidade iha suku tolu pertensia sub-rejiaun Oésilo, servisu hamutuk ho PNDS no sujere katak komunidade mak tenke sai na’in ba projetu ruma hanesan traballadór labele oferese ba kompañia no buka traballadór hosi sub-rejiaun seluk, nune’e bele hamosu problema iha komunidade nia leet.

Nia husu ba Governu sentrál, bainhira aloka orsamentu, direta ba administrasaun sub-rejiaun sira maka jere dezenvolvimentu infraestrutura bázika iha suku no aldeia, nune’e autoridade lokál sira mak eskolla fatin projetu atu konstrui projetu PNDS nian, depois maka hetan observasaun no akompañamentu hosi ekipa PNDS rejiaun nian.

Responsavel tékniku PNDS sub-rejiaun Oésilo, Serafin Lafo hateten, nu’udar fasilitadór PNDS iha sub-rejiaun sente orgullu ba PNDS tanba komunidade maka benefisia direta ba obra hirak ne’ebé konstrui hosi programa PNDS.

Kona-ba partisipasaun komunidade, nia dehan, iha suku ida-idak kompostu hosi feto no mane inklui ema ho defisiente atu hili sira-nia prioridade no sira mak sai na’in hodi jere atividade no partisipa másima iha prosesu tomak.

“Prosesu implementasaun nia obstákulu ami hasoru iha terrenu mak prioridade hirak ne’ebé komunidade hili tuir nesesidade bázika barak mak seidauk implementa tanba orsamentu limitadu, maibé iha koñesimentu iha xefe suku sira mak propoin obra saida mak konstrui iha aldeia sira,” Serafin Lafo hateten.

Obra ne’ebé implementa iha suku tolu (3) suku Bobometo, Usitasae no Usitaqueno mak hanesan, konstrusaun sistema perfurasaun bee-moos iha aldeia Oébaha, suku Bobometo ho montante $37,696.45. Projetu ne’e seidauk finaliza tanba makin bomba maka aat, nune’e mós empreza ne’ebé responsavel lakohi kontinua, ho nune’e, ekipa PNDS sei kontinua halo negosiasaun ho empreza balun nune’e bele finaliza iha tempu badak.

Konstrusaun sistema perfurasaun bee-moos iha aldeia Buqui, suku Usitasae ho nia montante orsamentu $48,977.50, projetu ne’e komunidade sira uza ona, iha tempu badak sei halo termu entrega.

Reabilitasaun estrada rabat-betong iha aldeia Nibin, suku Usitaqueno ho nia montante orsamentu $44,339.35, projetu ne’e finaliza ona. Konstrusaun uma ba profesór iha aldeia Quibiselo, suku Bobometo ho montante orsamentu $15,703.55 no projetu ne’e finaliza ona.

Uma Kbiit Laek

Suku Bobometo iha aldeia Saben hetan uma kbiit laek rua ho medida 6×8 no montante orsamentu $17,000.00 kada uma, totál fundus ba uma rua ne’e $34,000.00 hosi benefisiáriu Maria Pauf ho Leonardo Sako.

Suku Usitasae iha aldeia Sifin hetan uma rua ho medida 6×8 no volume orsamentu $17,000.00 kada uma, totál fundus ba uma rua hamutuk $34,000.00 hosi benefisiáriu Cornelio Eni ho Domingos Caunan.

Suku Usitaqueno iha aldeia Nibin hetan uma rua ho medida 6×8 no valor orsamentu $17,000.00 kada uma, totál fundus ba uma rua ne’e $34,000.00 hosi benefisiáriu Alberto Abi ho Agustinho Elo.

Totál fundus Uma Kbiit Laek aloka ba iha sub-rejiaun Oésilo 2021 ba suku tolu (3), hamutuk $102,000.00.

Xefe suku Usitasae, Thomás Ulan Colo, hateten iha tinan 2015-2016 nia suku hetan projetu reabilitasaun estrada iha Igreja Oélmambai iha aldeia Sifin, no iha aldeia Pune konstrui sala partu nian iha postu saúde, no tinan 2020-2021 hetan kanalizasaun bee-moos iha aldeia Buqui.

Xefe suku Bobometo, José Elo espera iha tinan 2021 ekipa PNDS sei finaliza obra sira ho kualidade tanba gasta osan Estadu fó benefísiu ba povu.

“Ha’u nia suku iha aldeia sia (9), projetu balu hotu ona, maibé falta perfurasaun bee-moos iha aldeia Oébaha tanba nia bomba mak aat,” nia hateten.

Ricardo Sufa nu’udár komunidade hosi suku Usitasae, hateten implementasaun programa PNDS iha baze, komunidade seidauk hetan benefisia másimu tanba kada tinan konstrui obra ida iha aldeia ida, nune’e dalaruma hamosu dezentendimentu iha suku tanba aldeia balu mós seidauk hetan obra ruma hosi PNDS.

Totál populasaun iha sub-rejiaun Oésilo na’in-14.093, kompostu hosi suku Bobometo populasaun hamutuk 8,716, suku Usitasae (4,188) ho suku Usitaqueno (1,189).

Jornalista            : Abílio Elo Nini

Editór                 : Francisco Simões

HAKEREK NO HATÁN

Please enter your comment!
Please enter your name here