Prezidente Repúblika, Francisco Guterres “Lú Olo” halo lansamentu ba rezultadu peskiza eleitorál iha salaun Lalini, Larigutu, Komisaun Nasionál Eleisaun (CNE-sigla portugés), Dili, kinta (12/08). Imajen TATOLI/Egas Cristovão

DILI, 12 agostu 2021 (TATOLI)— Ema ho defisiente  iha direitu hanesan iha konstituisaun nia oin, tanba ne’e, presiza tau konsiderasaun mós ba direitu ema ho defisiénsia sira-nia votu.

Notísia Relevante : Prezidente Repúblika lansa rezultadu peskiza eleitorál

“Ha’u hakarak husu ba imi hotu atu haree mós ba direitu maluk defisiente sira-nian atu vota iha eleisaun prezidensiál no parlamentár nian.  Konstituisaun rekoñese direitu ida-ne’e no hateten katak Estadu iha devér, tuir ninia posibilidade, atu promove, liuhosi lei, protesaun ba ezersísiu direitu atu vota hosi maluk defisiente sira,”  Prezidente Repúblika, Francisco Guterres “Lú Olo”, afirma iha nia diskursu iha ámbitu lansamentu rezultadu peskiza eleitorál iha salaun Lalini, Larigutu, Komisaun Nasionál Eleisaun (CNE-sigla portugés), Dili, kinta ne’e.

Timor-Leste, tuir PR Lú Olo hatuur-an nu’udar Estadu Direitu Demokrátiku bainhira restaura independénsia iha 20 maiu 2002, no hamriik ho Konstituisaun moderna ida, aprova hosi Assembleia Konstituinte.  Ho Assembleia boot ida ho ida-idak nia hanoin rasik no mós ho pezu partidu ida-idak nian, reprezentante povu 88 hili hosi partidu polítiku 12, konsege fó neon ba malu no prodús duni, iha tempu badak ida, lei define prinsípiu direitu, demokrasia, soberania nasionál, independénsia nasionál no unidade nasionál.

Konstituisaun RDTL ne’e mak sai matadalan ba projetu lei ordinária  sira-ne’ebé Parlamentu Nasionál aprova no Prezidente Repúblika promulga no nakfila ba lei bainhira publika ona iha Jornál Repúblika.

“Ita-nia Konstituisaun tau as vontade povu nian no dignidade ema-nian. Tanba soberania no podér polítiku iha povu nia liman mak artigu 7 Konstituisaun RDTL fó kbiit ba povu atu hili partidu polítiku ka koligasaun polítiku-partidária no indiretamente, deputadu no ukun-nain sira, liuhosi eleisaun universál, livre, iguál, diretu, sekretu no periódiku, ne’ebé  ita hala’o kada tinan lima,” Xefe Estadu hateten.

Prezidente CNE, Alcino de Araújo Barris rasik mós  hatete eleitór sira presiza hasa’e kualidade ida-ne’ebé mak seidauk esplora ho di’ak. Tanba ne’e mak CNE aposta programa edukasaun sívika mai ho pretensaun hodi hadi’a kualidade.

“Hahú hosi kuda iha sosiedade ne’ebé mak relativamente joven no entende mós ba ita-nia komunidade rurál, ema ho defisiénsia no grupu feto, hodi eleva sira-nia koñesimentu no espíritu pertense ba aktu eleitorál. Tanba ne’e mak ezije tratamentu delikadu no rigorozu tebes no klaru katak atu implementa ida-ne’e mak CNE tenke kontinua halo investimentu nafatin iha área rekursu umanus,” Alcino Barris tenik.

Edukasaun Sívika nu’udar forma ida-ne’ebé sólidu tebes atu garante partisipasaun eleitór no mós insentiva atu haburas kultura demokrátiku partisipativu ho dinámiku luan tebes.

Jornalista   : Osória Marques

Editór        : Francisco Simões 

HAKEREK NO HATÁN

Please enter your comment!
Please enter your name here