Logotipu PNDS

OÉ-CUSSE, 12 agostu 2021 (TATOLI)-Atividade Programa Nasionál Dezenvolvimentu Suku (PNDS)  Iha Sub-Rejiaun Nitibe, Rejiaun Administrativu Oé-Cusse Ambeno (RAEOA) fó benefísiu direta ba povu iha área remota sira.

Iha Sub-Rejiaun Nitibe, Rejiaun Administrativu Oé-Cusse Ambeno (RAEOA) iha suku lima (5) mak sai alvu ba PNDS hodi halo konstrusaun infraestrutura báziku iha suku laran, reabilita sede suku, instalasaun ba kanalizasaun bee-moos no atividade sira seluk tan ne’ebé lori benefísiu direta ba komunidade.

Jestór PNDS Sub-Rejiaun Nitibe, Manuel Tolan, informa iha 2020-2021 sub-rejiaun Nitibe iha suku (5) sai alvu ba programa PNDS, suku Bene-Ufe, Usitaco, Lela-Ufe, Suni-Ufe, no Ban-Afi.

Nia hateten,  durante implementasaun PNDS iha sub-rejiaun Nitibe  hetan kolaborasaun di’ak no ativu tebes hosi komunidade hodi ezekuta programa sira ba obra projetu no jere rasik orsamentu PNDS ho transparénsia.

Rezultadu servisu PNDS nian ho kolaborasaun di’ak hosi komunidade maka iha suku Ban-Afi benefisia ba kanalizasaun bee-moos fatin rua, iha suku Lela-ufe mós kanalizasaun bee-moos iha aldeia Kuat-Enes, loke mini merkadu iha aldeia Bebu no halo uma ba profesór iha aldeia Hau-Ufe, no kanalizasaun bee-moos iha aldeia Mahata.

Iha suku Uistaco halo fasilidade sanitáriu  komún iha sede suku, konstrui irrigasaun iha aldeia Kuantua no halo estrada rabat-beton iha aldeia Oam-Mna, iha suku Suni-Ufe halo reabilitasaun estrada no iha suku Bene-Ufe halo irrigasaun no halo estrada rabat-beton fasilita ba komunidade atu asesu ba merkadu.

Jestór PNDS Sub-Rejiaun Nitibe, Manuel Tolan apela ba komunidade iha sub-rejiaun Nitibe katak, obra ne’ebé maka PNDS konstrui ona iha baze bele utiliza ho didi’ak tanba ne’e hanesan patrimóniu ba suku nian.

“Ha’u husu mós ba Governu sentrál no RAEOA atu kontinua aumenta volume infraestrutura bázika iha área remota ba aspetu sira seluk, tanba iha fatin barak no aldeia balu seidauk kobre hotu,” Nia  hateten.

Xefe suku Lela-Ufe, José Neno Sila, hateten nu’udar autoridade lokál suku Lela-ufe, agradese ba PNDS tanba iha suku Lela-Ufe PNDS ajuda komunidade liuliu ba bee-moos, loke mini merkadu no halo uma ba profesór

Nia hateten, durante implementasaun  servisu PNDS nian iha kolaborasaun di’ak tebes ho autoridade lokál suku Lela-Ufe no nia rezultadu servisu lori ksolok ba komunidade.

Xefe suku Usitaco, Hilario Babo hateten iha suku Usitaco, aldeia Oam-Mna’a hetan projetu tolu hanesan, kanalizasaun bee-dalan, estrada rabat-beton no konstrui sanitasaun públiku iha sede suku Usitaco.

“Ami xefe suku ho xefe aldeia sai hanesan monitorizasaun no fiskalizasaun. Ami haree obra sira-ne’e ajuda ami-nia  komunidade iha suku Usitaco, tanba aldeia Oam-Mna’a merese duni atu konstrui obra sira-ne’e,” Hilario Babo tenik.

Nia sujere ba Governu atu kontinua implementa atividade PNDS iha baze, tanba iha suku Usitaco, aldeia tolu sedauk sente benefisia hosi PNDS.

Fasilitadór Téknika PNDS sub-rejiaun Nitibe, Antonio Sequeira Beno Falo, orgullu ho programa ne’e tanba bele rezolve nesesidade komunidade iha área remota, liu-liu infrastrutura bázika sira.

Nia hatete, sub-rejiaun Nitibe ne’e tama iha faze terseiru (3), nune’e Nitibe implementa ona siklu segundu (2) no obra sira ne’e mós finaliza ona. Ba siklu terseiru iha tinan 2021 ne’e seidauk implementa projetu fízika maibé agora sosializasaun faze terseiru ba suku  lima  remata ona no tuir planu sei implementa iha  agustu ne’e.

Primeiru siklu:

  1. Iha suku Ban-Afi: Kanalizasaun bee-moos gravitasaun iha aldeia Caunobe bairo Nefomtasa ho nia distánsia metru 2.820 ho nia valór orsamentu $24.154.65 no konstrui kanalizasaun bee-moos gravitasaun iha aldeia Cuanobe, bairru Cuanobe ho nia distánsia metru 2.200 ho nia valór orsamentu $17.029.85.
  2. Suku Lela-Ufe: Loke mini-merkadu iha aldeia Bebo medida metro 6×12, ho fasilidade saneamentu públiku ho valór orsamentu $13.988.00 no konstrui kanalizasaun bee-moos gravitasaun iha bairru Kuat-Enes ho nia distánsia metro 1.700 valór orsamentu $17.971.00 no mós halo uma ba profesór iha bairru Nefolete, aldeia Hau-Ufe ho medida metro 7×8 valór orsamentu $12.290.00.
  3. Suku Uistaco: Konstrui irrigasaun iha aldeia Kuantua, bairru Bona ho distánsia metro 1480, valór orsamentu $44.250.00
  4. Suku Suni-Ufe: Reabilitasaun estrada rurál (estrada britas) ho nia distánsia metru 2.100 ho valór orsamentu $36.499.25.
  5. Suku Bene-Ufe: Reabilitasaun estrada rurál (estrada britas) ho nia distánsia metru 2.200 ho valór orsamentu $48.740

Segundu siklu:

  1. Suku Ban-Afi: Kanalizasaun bee-moos iha aldeia Neofmetan, bairru Kusi no Lole ho distánsia metru 2.700 ho valór orsamentu $40.133.60.
  2. Suku Lela-Ufe: Konstrui perfurasaun sistema bee-moos iha aldeia Mahata ho distánsia metro 2000 ho nia valór orsamentu $37.483.05
  3. Suku Uistaco: konstrui sintina públiku iha sede suku, ho valór orsamentu $4.780 no halo reabilitasaun estrada rurál (pakote) ho distánsia metru 800 no halo estrada rabat beton metru 86 iha aldeia Oam-mna, bairru Náno’e ho valór orsamentu $32.705.25. totál orsamentu gasta iha aldeia Kuantua hamutuk $37.485.45.
  4. Suku Suni-Ufe: Reabilitasaun estrada rurál ho distánsia metru 1.200 ho valór orsamentu $33.565.60.
  5. Suku Bene-Ufe: Konstrui kanál irrigasaun iha aldeia Manan ho distánsia metro 1.118 ho valór orsamentu $40.799.38

Totál populasaun iha sub-rejiaun Nitibe na’in-15,059; kompostu hosi suku Ban-Afi populasaun hamutuk 2,415, suku Bene-Ufe (3,172), suku Lela-ufe (4,120), suku Suni-Ufe (2,310) ho suku Usitaco, populasaun hamutuk 3,042.

Jornalista            : Abílio Elo Nini

Editór                 : Francisco Simões

HAKEREK NO HATÁN

Please enter your comment!
Please enter your name here