MTKI-BNCTL sosializa kréditu suave negósiu sosiál ba emprezáriu sira, iha salaun MAP Comoro, kuarta (11/08). Imajen TATOLI/Francisco Sony

DILI, 11 agostu 2021 (TATOLI)—Ministériu Turizmu Komérsiu no Indústria (MTKI) hamutuk ho Banku Nasionál Komérsiu Timor-Leste (BNCTL, sigla portugés) realiza workshop atu sosializa kréditu suave ho funan 3% ba kada tinan ho períodu durante fulan-tolu to’o neen ba mikro, pekena no média empreza.

Diretór Ezekutivu BNCTL, Brígido de Sousa, hateten, parte kompetente hakarak fasilita empreza asesu finaseiru liuhosi kréditu ne’e maibé presiza kompleta rekezitu.

Diretór Ezekutivu BNCTL, Brígido de Sousa. Imajen TATOLI/Francisco Sony

“Rekezitu ne’ebé banku aplika tenke iha negósiu, lisensa hosi Servisu Rejistu Verifikasaun Emprezariál (SERVE) no empreza ne’ebé halo negósiu tenke iha área ne’ebé hatuur ona iha rekezitu,” Diretór Ezekutivu Banku informa iha salaun Ministériu Agrikultura Peska (MAP), Comoro, kuarta ne’e.

Programa ne’e foku liu ba empreza sira ne’ebé halo negósiu iha área produtivu hanesan agrikultura, turizmu, pekuária, peska, indústria no komérsiu hodi kria kampu traballu iha rai-laran.

MTKI-BNCTL sosializa kréditu suave negósiu sosiál ba emprezáriu sira, iha salaun MAP Comoro, kuarta (11/08). Imajen TATOLI/Francisco Sony

Tuir Dirijente ne’e, parte banku la hanoin atu manán buat ruma hosi atividade ne’e.

“Ita bele dehan kustu ne’ebé BNCTL hasa’e ne’e rázio laiha, tanba laiha banku ida iha Timór mak fó kréditu ho funan kiik,” nia akresenta.

Semana hirak liubá, MTKI no BNCTL asina akordu ho proponente haat ne’ebé sai benefisiáriu ba fasilidade garantia kréditu suave ba programa negósiu sosiál.

Notísia relevante: MTKI-BNCTL asina akordu ho benefisiáriu garantia kréditu sosiál

“Ami atribui ona finansiamentu ba empreza haat ne’ebé prenxe rekezitu no viável hodi asesu kréditu suave,” nia hatutan.

Daudaun iha proposta hitu mak tama ba komisaun responsável ne’ebé kompostu hosi MTKI, BNCTL, Kámara Komérsiu Indústria, Timor-Leste (CCI-TL) no Institutu Apoiu Dezenvolvimentu Emprezariál (IADE) hodi halo avaliasaun no verifikasaun.

“Semana oin ami atu atribui tan fundu, maibé ekipa sei haree,” nia tenik.

Iha biban hanesan, Vise-Ministru Turizmu Komérsiu no Indústria, Domingos Lopes Antunes, hateten, hafoin lansa programa iha semana kotuk mak foin estabelese mekanizmu.

Vise-Ministru Turizmu Komérsiu no Indústria, Domingos Lopes Antunes. Imajen TATOLI/Francisco Sony

“Programa  ne’e atu fasilita empreza rekupera fali atividade iha situasaun pandemia. Biar ita hasoru dezafiu atu introdúz ba empreza, maibé la’o ho di’ak hodi halo negósiu foun,” nia subliña.

Governante ne’e dehan, atu sai benefisiáriu ba programa ne’e, empreza tenke halo planu negósiu iha setór produtivu.

“Fasilidade kréditu suave hodi apoiu setór privadu hanesan empreza kiik no médiu atu investe iha setór produtivu,” nia reforsa.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here