Vise-Ministru Turizmu, Komérisu no Indústria, Domingos Lopes Antunes. Imajen TATOLI/Francisco Sony

DILI, 11 agostu 2021 (TATOLI)—Ministériu Turizmu, Komérsiu no Indústria (MTKI) responsável distribuisaun Cesta Bázika iha Dili no área urbana sira, rejista reklamante hamutuk 21.000.

Tuir Vise-Ministru Turizmu, Komérsiu no Indústria, Domingos Lopes Antunes, distribuisaun ba benefisiáriu konklui ona, maibé lista pendente Cesta Bázika ne’ebé responsavél direta hosi MTKI barak liu Dili no Ermera.

“Semana oin sei selebra kontratu filafali ho empreza sira atu hahú  halo distribuisaun, tanba ne’e ema-nia direitu hotu sei hetan hanesan,” Vise-Ministru, hateten iha salaun Ministériu Agrikultura no Peska (MAP), Comorom kuarta ne’e.

Tuir Governante ne’e, iha kompañia tolu mak MTKI sei kontrata hodi halo distribuisaun ba reklamante sira.

 “Ami sei haree kompañia ne’ebé ninia performa di’ak iha distribuisaun Cesta Bázika antes ne’e, nune’e ema la krítika,” nia akresenta.

 Ho nune’e, Vise-Ministru garante sei finaliza distribuisaun Cesta Bázika iha fulan ne’e nia laran.

“Ha’u gante katak sei rezolve lista pendente sira ne’e,  tanba hela oituan de’it,” nia hatutan.

Ministériu Turizmu, Komérsiu no Indústria responsável ba kompañia fornesedór 75, ho totál orsamentu millaun $11.

MTKI responsável ba distribuisaun Cesta Bázika ho modalidade voucher ba benefisiáriu hamutuk 287.770 iha postu administrativu haat iha munisípiu Dili no iha área urbana sira.

Loja sira ne’ebé mak fasilita voucher ba benefisíariu sira iha Dili hamutuk loja 15 hanesan Amigu To’os-nain, Loja agrikultór, Jacinto Supermarket, Lita Store, Lisun Supermarket, funan Buras, Acelda, Starking, May Mart, Fitun, W four, Maubara no seluk tan.

Antes ne’e, Governu halo ona pagamentu ba 94 hosi kompañia 174, kompostu hosi MTKI ba kompañia 50 ho totál pagamentu $10.635.966,50, Sekretaria Estadu Kooperativa (SEKoop) ba kompañia 24 ho totál pagamentu $12.498.312,50, no Sentru Lojíztika Nasionál (CLN, sigla portugés) ba kompañia 20 ho totál pagamentu $2.200.064,30, nune’e, totál pagamentu ba kompañia 94 hamutuk $25.079.090.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here