Sekretáriu Jerál Federasaun Futeból Timor-Leste (FFTL), Nelio Isaac Sarmento. Imajen Tatoli/António Gonçalves

DILI, 10 agostu 2021 (TATOLI) – Tuir publikasaun kalendáriu tentativa ne’ebé Liga Futeból Timor-Leste (LFTL) no Federasaun Futeból Timor-Leste (FFTL) iha fulan kotuk katak, jogu hotu sei hahú iha 20 agostu ne’e, maibé bazeia ba kondisaun real kalendáriu ne’e labele implementa  iha pratika. Nune’e,   adia fali ba setembru 2021.

Notísia Relevante : 16 agostu, FFTL abertura jogu LFT

“Iha enkontru ho klube 20, foin lalais ne’e, ami diskute asuntu lubuk ida ho klube sira iha Primeira Divizaun no Segunda Divizaun, ami rona klube sira barak mak seidauk preparadu iha kalendáriu ne’ebé ami públika,” Sekretáriu Jerál FFTL, Nelio Isaac Sarmento, informa ba Agência Tatoli, foin lalais ne’e.

Nia dehan, razaun forte klube sira halo adiamentu ba jogu ne’e tanba LFTL seidauk fó informasaun klaru ba sira kona-ba ajenda hotu ne’ebé sei hala’o tinan ne’e.

“Sira preokupa ida mós mak sistema apuramentu ne’ebé hosi órgaun Liga aprova iha sira-nia kongresu. Se ita halo liga agora faze apuramentu ba klube sira iha Segunda Divizaun hodi hadau tiketi ba Primeira Divizaun hodi kompleta klube 10 ne’e oinsá. Entaun ami ko’alia la tuir malu no ami konkorda atu adia fali kopa FFTL ba loron 01 setembru mak komesa no liga ho tasa 12 Novembru tuir kedan,” nia esplika.

Iha fatin hanesan Sekretáriu Jerál klube Primeira Divizaun AD SLB Laulara, Olandino Caero, hateten durante ne’e jogu hotu paradu tanba pandemia global Covid-19 no derrepente órgaun LFTL no FFTL hasai despaixu atu hahú jogu no la sukat kapasidade klube nian.

“Sira la sukat kapasidade klube sira nian. Ami la’ós la preparadu maibé situasaun ne’e obriga buat hotu paradu,” nia tenik.

Hatán ba kestaun ne’e Sekretáriu Ezekutivu LFTL, Francisco Marçal S. da Silva hateten sei koordena ho Prezidente Nilton Gusmão mak foin bele fó resposta ba klube sira nia preokupasaun ba jogu apuramentu hodi kompleta klube 10 iha Primeira Divizaun.

“Buat hotu klube sira ko’alia ne’e, ami rejista tiha pois sei konfirma ho prezidente mak bele fó fali resposta ba klube sira ita hasoru malu iha semana ne’e ka semana oin atu ko’alia,” nia dehan.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here