Progresu konstrusaun UKL iha Suku Lahomea, Postu Administrativu Maliana, Munisípiu Bobonaro, segunda (09/08). Imajen Tatoli/Sérgio da Cruz.

BOBONARO, 09 agostu 2021 (TATOLI)—Diretór Programa Nasionál Dezenvolvimentu Suku (PNDS), munisípiu Bobonaro, Paulino Viegas Tilman, informa konstrusaun Uma kbi’it Laek (UKL), iha munisípiu ne’e, foin implementa iha suku neen.

Suku neen maoria iha postu administrativu Maliana mak hanesan suku Odomau, Raufun, Tapo-Memu, Holsa, Lahomea no Ritabou.

Notísia relevante:Governu hahú konstrui uma kbiit laek iha Bobonaro

Kona-bá suku Saburai mak seidauk hahú konstrusaun, no hosi suku neen ne’e, suku Lahomea konstrusaun mak to’o ona 45%, enkuantu suku-sira seluk atraza tanba ligadu ho atividade kulturál balun ne’ebe tenke hapara serbisu durante semana tomak.

“Ita hahú ona prosesu konstrusaun, ho atinjimentu ne’ebé la hanesan, balun 40%, balun 45% no balun persentajen sei kiik liu,” Paulino Viegas Tilman, informa ba jornalista Agência Tatoli, iha kna’ar fatin, segunda ne’e.

Implementasaun projetu iha suku balun atraza, tanba sei iha prosesu kuotasaun atu aranja hodi kompañia fornesedór, atu distribui materiál lokál no fabrikadu ba suku-sira ne’ebé dook no área rurál-sira.

Iha tempu badak, konstrusaun sei hahú hotu kedan iha munisípiu Bobobaro laran tomak, tanba daudaun ne’e hahú ona fahe kuotasaun no suku balun komesa ona mobiliza traballadár, depois ida-ne’e kompañia fornesedór sei distribui materiál ba kada suku, nune’e bele hahú konstrusaun antes udan monu rai.

Iha fatin hanesan, benefisiária Paulina Habu, agradese ba Governu tanba bele tulun hodi hakmán sofrimentu ne’ebé nia hasoru durante ne’e. Paulina Habu konsidera programa ne’e ajuda tebes nia ho família tanba bele hetan uma dignu.

PNDS munisípiu Bobonaro mós halo ona koordenasaun ho parte Serbisu Agua no Saneamentu (SAS) atu fornese bee ba komunidade hadi hala’o konstrusaun.

Orsamentu ne’ebé prevee ba autoridade munsipál Bobonaro liuhosi programa PNDS ba UKL hamutuk millaun $2.7.

Hosi totál ne’e, finansia ba atividade fíziku hamutuk millaun $2.6 ba suku 50 iha aldeia alvu 150, operasionál $150.000 no osan ba BNCTL $5.400.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here