Inspetór Jerál Traballu, Rofino Lopes dos Reis. Imajen TATOLI/Antónia Gusmão

DILI, 09 agostu 2021 (TATOLI)–Inspetór Jerál Traballu (IGT, sigla portugés), Rofino Lopes, informa, parte inspesaun rejista kompañia 108 taka atividade ekonómika tanba situasaun pandemia, hahú tinan 2020 to’o 2021.

“Tuir dadus, kompañia taka totál atividade hahú tinan kotuk implementa Estadu Emerjénsia tanba kauza COVID-19 to’o agora hamutuk 108 no traballadór ne’ebé lakon serbisu hamutuk 771,” Inspestór Jerál Traballu informa iha ninia knaar fatin, Hudi-laran, segunda ne’e.

Nia esplika, hosi totál kompañia ne’ebé taka atividade, maioria empreza internasionál no kompañia lokál hamutuk lima.

“Razaun fundamentál kompañia taka, hahú tinan 2017 ita tama impase polítika no fundamentu liu maka situasaun COVID-19,” nia akresenta.

Nia fó ezemplu, hanesan kompañia Kmanek Traning  hasoru problema iha tinan 2017 momentu impase polítika no to’o tinan 2020, bainhira COVID-19 nia redúz traballadór to’o taka totál kompañia nia atividade.

“Kompañia balun uluk laiha kbiit atu selu taxa no barak mai hasoru ami hodi husu Governu atu redúz taxa no balun hakarak eletrisidade atubele ajuda atividade. Maibé ha’u hateten ba sira, ida-ne’e la’ós kompeténsia ami-nia, tenke liga ba ministériu relavante hanesan Ministru Koordendór Asuntu Ekonómika,” nia hatutan.

Ba kestaun ne’e, parte IGT kolabora hamutuk Servisu Rejistrasaun no Verifikasaun Emprezariál (SERVE) ne’ebé Kompañia ezistente ne’ebé atividade la’o hela, maibé redúz ninia ema hamutuk Kompañia 54, ne’ebé hosi númeru ne’e kompañia estrajeiru 38 mak redúz ninia ema hamutuk 254.

“Iha sesta ne’e, ha’u simu informasaun hosi kompañia balun ne’ebé daudaun redúz hela ema 16 no sira husu hela atu halo pagamentu ba traballadór nia direitu, tanba ne’e ha’u orienta ekipa atu haree situsaun ne’e,” nia tenik.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here