Estudante Eskola Ensinu Sekundáriu Jerál (ESJ) Santu Estevão Viqueque, hahú ezame periúdu dahuluk, segunda (09/08/21). Imajen Tatoli/Vitorino Lopes da Costa.

VIQUEQUE, 09 agostu (TATOLI)—Eskola Ensinu Sekundáriu Jerál (ESJ) Santu Estevão Viqueque, hahú ezame periúdu dahuluk, no estudante na’in-ualu mak la partisipa tanba pozitivu COVID-19.

“Ohin ita hahú ezame, maibé estudante na’in-ualu la partisipa tanba sira pozitivu COVID-19 no sei kumpri loron sanulu resin haat (14) iha izolmentu Viqueque. Bainhira kumpre ona mak sira foin bele tuir ezame,” Diretór eskola, Martinho Mariano Amaral, hateten ba jornalista Agência Tatoli, iha Caraubalu, segunda ne’e.

Notísia relevante:Populasaun Viqueque 21.845 simu ona vasina

Nia konta-tuir katak, iha fulan agostu ne’e estudante na’in-rua mak pozitivun uluk, nune’e pesoál saúde sira mai buka-tuir kontaktu besik iha sala-de-aula rua hodi halo swab teste ba estudante hamutuk na’in-32 ikus mai deteta tan na’in-neen.

Atividade eskolár iha eskola ne’e hahú re-ativa loloos iha loron 19 fulan jullu 2021, no tanba situasuan COVID-19, nune’e foin hahú realiza ezame primeiru periúdu ne’ebé fahe ba turnu rua, ida iha dader no ida iha lorokraik.

Eskola ne’e iha totál estudante na’in 293 mak partisipa iha ezame periúdu dahuluk nian, ne’ebé sei remata iha iha sexta 13 agostu.

Durante ezame, estudante-sira obrigatóru tenke kumpri regra prevensaun COVID-19 hanesan uza máskara, fase liman ho sabaun no distánsia sosiál.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here