Kontra atake entre jogadór Aitana FC no Kablaki FC iha Kampu Demokrasia. Imajen/Mídia LFA

DILI, 09 agostu 2021 (TATOLI) – Treinadór klube Primeira Divizaun Aitana FC, Octavio da Costa Soares, hateten daudauk ne’e halo hela preparasaun hodi kompete iha jogu ne’ebé mak Órgaun Liga Futeból Timor-Leste (LFTL) no Federasaun Futeból Timor-Leste (FFTL) sei organiza iha époka 2021.

Notísia Relevante : 16 agostu, FFTL abertura jogu LFT

“Ami hala’o preparasaun ona, jogadór sira maioria rai-laran de’it, hanoin atu rekruta jogadór rai-li’ur maibé ho pandemia Covid-19 labele no mantein ho jogadór uluk nafatin,” Octavio da Costa Soares, informa ba Agência Tatoli iha kampu FFTL, Dili, segunda ne’e.

Nia dehan, totál jogadór ne’ebé kontratu ona ho Aitana hamutuk na’in-23. Enkuantu maioria jogadór kompleta ona vasina ba doze daruka nian.

“Jogadór sira vasina dala-rua ona, tuir rekijitu  FFTL ho LFTL nian ami kumpre ona, hein de’it atu jogu,” nia  hateten.

Tuir oráriu jogu ba kopa FFTL sei abertura iha 20 agostu agora. Iha ne’ebé sei partisipa husi klube 20 hosi Primeira Divizaun no Segunda Divizaun.

Klube Primeira Divizaun mak hanesan, Karketu Dili FC, Boavista FC Timor, AD SLB Laulara, Lalenok United FC, Aitana FC, DIT FC, AS Ponta Leste no Assalam FC. Enkuantu Segunda Divizaun mak hanesan, Kablaki FC, Atletico Ultramar, Porto Taibessi FC, Sporting Clube de Timor, Zebra FC, FIEL FC, Academica FC no Emanuel FC.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here