Xefe Estadu Maiór F-FDTL, Brigadeiru Jenerál Calisto dos Santos Coli ‘Coliati, entrega lembransa ba Kolonel Santacroce, iha seremónia enseramentu ezersísiu konjunta ‘dalan ba dame’, iha Komponente Terrestre, Lanud Baucau, sesta (06/08). Imajen TATOLI/Natalino Belo

BAUCAU, 06 agostu 2021 (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Brigadeiru Jenerál Calisto dos Santos Coli ‘Coliati’, iha esperansa ezersísiu konjunta ‘dalan ba dame’ entre F-FDTL no Forsa Estadu Unidu Amérika (EUA) sei kontinua iha futuru.

“Ita espera sei kontinua nafatin ba oin, nune’e forsa rua bele koopera iha área militar no iha área ne’ebé bele apoia ba sosiedade sivíl hanesan iha parte enjeñaria no saúde atubele dezenvolve iha futuru oin mai,” Brigadeiru Jenerál Coliati, hateten, iha Komponente Terrestre, Lanud Baucau, sesta ne’e.

Notísia relevante: Troka esperiénsia téknika-tátika operasaun hanesan esersísiu dalan ba dame

Forsa konjunta ne’ebé tuir ezersísiu ‘dalan ba dame’, iha Komponente Terrestre, Lanud Baucau, sesta (06/08). Imajen TATOLI/Natalino Belo

Tuir Coliati, objetivu prinsipál hosi atividade ne’e mak atu hametin kooperasaun bilaterál entre nasaun rua, espesiál ba forsa terrestre no infranteria ezersitu EUA, nune’e parte rua bele fahe esperiénsia iha área téknika no tátika operasaun militár no aprende kultura entre nasaun rua.

“Ita bele aprende kultura hosi Amérika no maluk kompañeiru hosi forsa amerikanu bele aprende hosi ita-nia forsa sira, kona-ba kultura, istória, tradisaun, no maneira moris, atu nune’e bele hametin liután kooperasaun no amizade,” nia akresenta.

Demostrasaun operasaun militár iha seremónia enseramentu ezersísiu konjunta ‘dalan ba dame’, iha Komponente Terrestre, Lanud Baucau, sesta (06/08). Imajen TATOLI/Natalino Belo

Ezersísiu konjunta ne’e foin ba dahuluk, ne’ebé realiza durante semana rua, hahú  loron 26 jullu no termina ohin iha Komponente Terrestre F-FDTL Lanud Baucau.

Forsa rua kompostu hosi kompaña idaidak, ne’ebé hosi parte EUA lideradu hosi Kolonel Santacroce no hosi F-FDTL lideradu hosi Kapitaun Infantaria, Nogéra Laranzinha.

Seremómia enseramentu ne’e partisipa hosi Enkaregadu Negósiu Embaixada no Embaixadór interinu  EUA, Thomas Daley, Autoridade munisípiu Baucau, Konsellu Kombatente Libertasaun Nasionál Baucau inklui entidade relevante sira.

Iha ámbitu ne’e, forsa rua hatudu demostrasaun konjunta, ne’ebé hanesan parte kooperasaun ida  bainhira hala’o operasaun militár.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here