Autoridade munisípiu Baucau, Lautém no Viqueque foto hamutuk entidade relevante bainhira partisipa semináriu projetu fundu klima verde, ne'ebé realiza iha CCB, Villa antiga, kinta (05/08). Imajen TATOLI/Natalino Belo

BAUCAU, 05 agostu 2021 (TATOLI)–Responsável Projetu hosi Diresaun Nasionál Alterasaun Klimátika, Sekretaria Estadu Ambiente (SEA), Augusto Manuel Pinto, hateten, objetivu hosi implentasaun projetu fundu klima verde atu redús impaktu alterasaun klimátika.

“Atividade lubun ida ne’ebé implementa hosi Ministériu Administrasaun Estatál (MAE) mak dezenvolvementu rúral kona-ba bee-mos, estrada rúral no infraestrutra bázika seluk tan, maibé hetan impaktu hosi alterasaun klimátika, tanba ne’e projetu ne’e la’ós atu rezolve problema hotu maibé pelumenus bele suporta atu redús ita-nia problema,” Diretór Projetu hateten iha Sentru Konvensaun Baucau (CCB, sigla portugés), Villa antiga, kinta ne’e.

Tuir Augusto, projetu ne’e implementa atu responde ba kestaun klimátika ne’ebé Governu liuhosi SEA prevee ba sekretariadu fundu klimátiku verde ka Green Climate Fund (GCF), nune’e Governu bele hetan benefísiu hosi projetu ne’e hodi responde ba impaktu alterasaun klimátika ne’ebé Timor-Leste hasoru.

“Atividade ne’ebé ligadu ba impaktu alterasaun klimátika, ita sente orsamentu hosi Governu difísil atu responde ba problema hotu, entaun hosi fundu globál, ambiente liuliu fundu klima verde pelumenus bele redús ka suporta Governu nia orsamentu hodi responde ba atividade ne’ebé Governu planeia ona,” nia akresenta.

Iha fatin hanesan, Administradór munisípiu Viqueque, Januário Soares, hanesan autoridade munisípiu ne’ebé sai implementadór ba projetu fundu klima verde, fó impaktu ekonómiku ba komunidade sira tanba liuhosi projetu ne’e bele kanaliza bee-mos ba komunidade no hadi’a irrigasaun iha natar.

“Impaktu ekonomia iha tanba bainhira irrigasaun no bee-mos di’ak, bele fó impaktu ekonomia komunidade, liuliu minimiza kustu operasionál,” Januário hatutan.

Tuir nia, komunidade sira presiza irrigasaun di’ak atu halai natar no bee-moos atu konsume, ne’ebé bainhira ramata bele responde ona ba komunidade nia problema.

Projeitu ne’e rasik implementa iha munisípiu Viqueque, ne’ebé lokaliza iha suku Uani-uma, postu Uatucarbau no postu Uatu-lari, ligadu ba irrigasaun no bee-moos.

Projetu ne’e ba dahuluk implementa iha munisípiu neen hanesan Aileu, Ermera, Liquiçá, Baucau, Lautém no Viqueque.

Projetu ne’e ho durasaun tinan neen, hahú hosi tinan 2021 to’o 2026, ho totál orsamentu millaun $50 resin, kompostu hosi GCF-UNDP hamutuk millaun $22,4 no hosi Governu liuhosi fundu klimátika SEA hamutuk millaun $36

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here