MAE-RAEOA,, kinta. (5/8/2021) selebra MoU reforsa implementasaun PNDS iha Oé-Cusse. Imajen Tatoli/Abílio Elo Nini

OÉ-CUSSE, 05 agostu 2021 (TATOLI)-Governu sentrál liuhosi Ministériu Administrasaun Estatál (MAE), kinta ne’e selebra memorandu entendimentu (Memorandum of Understanding) ho Autoridade Rejiaun Administrativa Espesiál Oé-Cusse Ambeno (RAEOA) hodi reforsa implementasaun Programa Nasionál Dezenvolvimentu Suku (PNDS) iha Oé-Cusse

“Ami rekoñese katak jeografikamente, rejiaun hela iha fatin ne’ebé difisíl atu Governu sentrál kontinua fó asistensia, entaun Ministériu Administrasaun Estatál ho hanoin ida, perante PNDS implementa ho di’ak liu-tan, importante tebes papél rejiaun nian liuhosi supervizaun servisu hamutuk ho PNDS, nune’e implementa didi’ak iha RAEOA”, Ministru Administrasaun Estatál, Miguel Pereira de Carvalho, haktuir iha salaun administrasaun Numbei, suku Costa, sub-rejiaun Pante Makasar.

Governante ne’e fundamenta, iha rai boot hanesan 12 munisipiu, kuandu iha problema tékniku ruma, ekipa téknika PNDS sira sei ba haree no rezolve, maibé iha RAEOA difísil tebes, tanba jeografikamente dook, liuliu iha tempu Estadu emerjénsia no serka sanitária.

“Governu sentrál konsidera akordu selebrasaun MoU entre Ministériu Administrasaun Estatál ho RAEOA, aliende bele hametin liután kooperasaun entre instituisaun rua-ne’e atu garante PNDS tantu rekursu umanu, lojístika nomós infraestrutura ne’ebé konstrui hosi PNDS bele halo ho di’ak no kualidade”, tenik.

Prezidente Autoridade RAEOA, Arsenio Paixão Bano, kompromete sei akompaña atu garante kualidade projetu, tanba gasta osan Estadu fó benefísiu ba povu.

“Rejiaun haksolok ho selebrasaun MoU ne’e, ha’u hanoin akordu ida ne’e sei hametin liután programa nasionál ida ne’ebé importante ba infraestrutura bázika iha Oé-Cusse, autoridade hakarak halo akompañamentu ba kontrulu kualidade programa ne’e, tanba programa ne’e hosi servisu sentrál hosi Ministériu Estatál ninian, hetan apoia hosi Governu Austrália. Ita tenke aproveita ba moris-diak populasaun-nian, gasta osan Estadu tenki iha benefísiu liuhosi kualidade”, afirma Bano.

Partisipa iha selebrasaun MoU ne’e, membru autoridade RAEOA na’in sia, jestór sub-rejiaun hosi Oésilo, Pasabe, Nitibe ho Pante Makasar, xefe suku 16, inklui diretór no xefe departamentu.

Notísia relevante: PA RAEOA sujere ekipa PNDS konstrui infraestrutura bázika ho kualidade

Jornalista       : Abílio Elo Nini

Editór             : Cancio Ximenes

HAKEREK NO HATÁN

Please enter your comment!
Please enter your name here