Ekipa konjunta KFP no MEJD disemina informasaun ba profesór sira iha munisípiu Baucau, iha salaun INFORDEPE, Villa nova, kinta ( 05/08). Imajen TATOLI/Natalino Belo

BAUCAU, 05 agostu 2021 (TATOLI)—Ekipa konjunta, kompostu hosi Komisaun Funsaun Públika (KFP) no Diresaun Nasionál Rekursu Umanu hosi Ministériu Edukasaun, Juventude no Desportu (MEJD), disemina informasaun ba profesór sira iha Baucau, kona-ba rejime espesiál.

Komisáriu Funsaun Públika Asuntu Disiplinár, António Freitas, konsidera, presiza revee hikas Dekretu-Lei númeru 23/2010 kona-ba avaliasaun dezempeñu rejime karreira, tanba prejudika direitu funsionáriu sira ne’ebé tutela iha rejime espesiál, nune’e ba oin posibilidade iha alterasaun.

“Ho hanoin ida-ne’e mak ekipa konjunta mai halo dezamiñasaun ida-ne’e hodi hatene klean no hakbesik liu tan ba profesór, liuliu sira ne’ebé iha rejime espesiál, atu oinsa akomoda no altera rejistrasaun hirak ne’ebé presiza tenki haree no akompanã iha futuru,” Komisáriu Funsaun Públika hateten iha salaun Instituto Nacional de Formação de Docentes e Profissionais da Educação de Timor-Leste (INFORDEPE), Villa nova, kinta ne’e.

Aleinde ne’e, disemina mós informasaun kona-ba Dekretu-Lei númeru 40/2011 rejime lisensa no falta no Dekretu-Lei númeru 12/2016 kona-ba seguransa sosiál.

Tuir Komisáriu, iha parte balun Dekretu-Lei  sai problema, maibé pagamentu direitu retroativu hanesan vontade tomak hosi MEJD, liuliu Diresaun Nasionál Rekursu Umanu mak enkaminña ba KFP.

“KFP rasik prontu hein dokumentu hosi diresaun iha MEJD atu enkamiña dokumentu hosi profesór sira kona-ba dereitu retroativu ne’ebé iha tinan kotuk konsege hala’o ona pagamentu ba funsionáriu píbliku hosi MEJD hamutuk 1.200 resin,” nia akresenta.

Enkuantu, daudaun KFP simu ona dokumentu hamutuk 3.000 resin atu prosesa.

Iha fatin hanesan, Diretór Servisu Edukasaun munisípiu Baucau, Augusto Hornai Ximenes, agradese ba ekipa konjunta tanba bele disemina informasaun nune’e bele ajuda profesór sira.

“Ami hein, tanba iha preokupasaun hirak ne’ebé ami rejista ligadu ho problema sira ne’ebé akontese, halerik hosi profesór sira hanesan rejime karreira dosente, tanba ne’e ami rejista no kontinua aprezenta ba Diresaun Nasionál Rekursu Umanu MEJD no KFP,” Augusto hateten.

Totál funsionáriu permanente hosi munisípiu Baucau daudaun ne’e hamutuk 1.233, ne’ebé bazeia ba kompeténsia Servisu Edukasaun munisipál mak bele rejista, rekolla no halo avaliasaun dezempeñu, enkuantu funsionáriu eskalaun grau, Diresaun Nasionál Rekursu Umanu MEJD mak iha kompeténsia.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here