SEJD Abrão Saldanha, Prezidente FFTL, Francisco Jerónimo ho Prezidente LFTL Nilton Telmo Gusmão. Imajen/LFTL

DILI, 04 agostu 2021 (TATOLI) – Sekretáriu Estadu Juventude no Desportu (SEJD), Abrão Saldanha, informa nia parte transfere ona osan ho montante $310.000 ba Federasaun Futeból Timor-Leste (FFTL) atu bele haraik ba Liga Futeból Timor-Leste (LFTL) hodi realiza jogu iha agostu ne’e.

Notísia Relevante : 16 agostu, FFTL abertura jogu LFT

“Akordu ami asina ona, hein de’it finansas sentrál atu transfere ba konta FFTL nian, semana ida ne’e, tama ona, nune’e sira hamutuk ho órgaun liga bele organiza liga,” Abrão Saldanha bainhira remata reuniaun ho lider LFTL no FFTL iha edifísiu SEJD Dili, kuarta ne’e.

Daudaun ne’e, SEJD ko’alia hela ho Ministériu Saúde atu bele fó autorizasaun ba jogu hotu bele hala’o no SEJD garante sei iha duni jogu iha agostu nia laran.

Iha fatin hanesan Prezidente FFTL, Francisco Jerónimo hatete, bainhira orsamentu Governu nian ba ona sira nia konta mak sei haruka ba LFTL hodi hala’o atividade no FFTL rasik mós sei apoiu 50% ba jogu hotu organiza hosi LFTL.

“SEJD transfere osan mai FFTL ho garantia ida ne’ebé tuir akordu, nune’e ami mós investe hotu iha ne’ebá tuir akordu ne’ebé iha liu-liu haree ba klube sira. Ami nia apoiu ba klube sira hamutuk 20, kompostu hosi klube ualu (8) Primeira Divizaun no klube 12 iha  Segunda Divizaun.  Ba Primeira Divizaun $20.000 no Segunda Divizaun  $10.000, hanesan uluk SEJD atribui ba klube sira,” dehan Francisco Jerónimo informa.

Iha sorin seluk Prezidente LFTL Nilton Telmo Gusmão hateten, operadór liga prontu 100% realiza jogu kualkér momentu.

“Bainhira iha desizaun ona hosi FFTL no SEJD ami prontu kualkér momentu realiza liga, SEJD hanesan Estadu konsulta ona ho Ministériu Saúde fó lisensa atu hala’o jogu ami prontu. Kalendáriu tentative ami aprezenta ona, ita hein de’it komunikasaun entre SEJD ho Ministériu Saúde,” Nilton Gusmão hateten.

Relasiona ho orsamentu ne’ebé mak Governu ho FFTL apoiu ba órgaun liga sufisiente no liga rasik sei lobi ho patrosinadór sira atu apoiu hodi realiza jogu sira to’o remata.

Klube ne’ebé iha direitu absoluta partisipa iha jogu tolu ne’e mak klube hirak ne’ebé antes ne’e hamahan an iha LFTL nia okos kompostu hosi Primeira Divizaun no Segunda Divizaun.

Klube Primeira Divizaun mak hanesan, Karketu Dili FC, Boavista FC Timor, AD SLB Laulara, Lalenok United FC, Aitana FC, DIT FC, AS Ponta Leste no Assalam FC. Enkuantu Segunda Divizaun mak hanesan, Kablaki FC, Atletico Ultramar, Porto Taibessi FC, Sporting Clube de Timor, Zebra FC, FIEL FC, Academica FC no Emanuel FC.

Tuir kalendáriu ne’ebé publika sai ona mak jogu Kopa FFTL, Liga Futeból Timor-Leste no Tasa 12 de Novembru sei hala’o iha agostu nia laran no remata iha dezembru 2021.

Jornalista       : Hortencio Sanchez

Editór             : Francisco Simões

 

HAKEREK NO HATÁN

Please enter your comment!
Please enter your name here