Vice-MNEK, Julião da Silva akompana komunidade suku Nipani simu vasina COVID-19. Imajen/Mídia RAEOA-ZEESM.

OÉ-CUSSE, 04 agostu 2021 (TATOLI)—Vise-Ministru Negósiu Estranjeiru no Kooperasaun (MNEK), Julião da Silva, enkoraja Atoni-oan sira tenke serbisu hamutuk ho Unidade Patrullamentu Fronteira (UPF) hametin vijilánsia iha área fronteira, hodi prevene variante Delta COVID-19 tama iha Rejiaun Administrativa Espesiál Oecusse-Ambeno (RAEOA).

“Ita-nia seguransa sira liu-liu Unidade Patrullamentu Fronteira sei hala’o seguransa metin iha pontu estrada sira iha fronteira no fatin sira-ne’ebé durante ne’e konsidera hanesan dalan ilegál. Ne’e ita-nia seguransa sira persiza serbisu maka’as atu prevene ita-nia sidadaun sira labele hakat ba rai sorin, nune’e mós sira sorin labele tama mai ita-nia nasaun,” Julião da Silva informa ba jornalista sira, bainhira vizita kortejia RAEOA, kuarta ne’e.

Entretantu, Prezidente Autoridade RAEOA, Arsénio Paixão Bano, apela ba komunidade iha área fronteira atu kontribui fó apoia ba serbisu autoridade seguransa ho ekipa saúde nian hodi kombate COVID-19 iha Oé-Cusse.

“Autoridade husu populasaun Oé-Cusse labele hakat liu fronteira. Labele simu ema hosi fronteira. Labele halo transaksaun ilegál ne’e, ita hatete beibeik ona. Ita-nia UPF halo vijilánsia sira halo serbisu ho másimu. Ita persiza ajuda hosi komunidade apoia serbisu autoridade atu labele prátika transaksaun ilegál,” nia apela.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here