Aliansa Nasionál Kontrolu Tabaku Timor-Leste (ANCT-TL) no Organizasaun FONGTIL, realiza simonáriu ho tema "Hasa'e Taxa Tabaku ba Timor-Leste Saudável". Iha Hotel JL Villa Fatuhada, kuarta (04/08). Imajen Tatoli/Francisco Sony

DILI, 04 agostu 2021 (TATOLI)-Aliansa Nasionál Kontrolu Tabaku Timor-Leste (ANCT-TL, sigla portugés) ho Forum Organizasaun Naun Governamentál Timor-Leste (FONGTIL), kuarta ne’e, realiza semináriu ho tema “Hasa’e Taxa Tabaku ba Timor-Leste Saudavel”.

Diretór ANCT-TL, Sancho Fernandes, informa ANCT-TL no FONGTIL realiza atividade ne’e tanba TL sai hanesan nasaun ida ne’ebé ho taxa fuma aas iha mundu maizumenus porsentu 60.7 mane adultu no porsentu 9.4 adultu feto uza tabaku iha 2020, prevalénsia tabaku entre foin sa’e sira mós aas iha 2019 besik 42% hosi mane 21% feto idade 13-15 mak uza tabaku.

“Hosi semináriu ne’e ko’alia kona-ba hasa’e folin tabaku ba Timor saudavel no ko’alia mós kona-ba efetividade taxa tabaku hosi nasaun seluk hodi dezenvolve polítika taxa tabaku ne’ebé efetivu ba Governu Timor-Leste,” Diretór ANCT-TL, Sancho Fernandes, hateten liuhosi nia diskursu iha ámbitu semináriu ne’ebé iha salaun Otél JL. Villa, Fatuhada, Dili.

Nia hatutan, tanba globalmente hatudu katak tabaku oho ema millaun ualu (8) kada tinan no sai hanesan fatór risku potensiál ba Moras La Hada’et (MLH) hanesan, kankru, diabetes, atakasaun fuan, stroke moras pulmaun no seluk tan.

“Moras la hada’et sai hanesan kauza prinsipál ba taxa mortalidade iha ita-nia rai ne’ebé responsavel ba porsentu 45, ema mate kada tinan, tuir relatóriu espesialista 2018 ema 354 hosi kazu diabetes, 745 kazu kardíaku ka fuan ne’ebé vistu iha Ospitál Nasionál Guido Valadares (HNGV-sigla portugés) besik 11% ka ema ida no rua kada loron baixa tanba moras stroke,” nia dehan.

Nia afirma, tuir relatóriu monitorizasaun ba moras la hada’et iha tinan 2016-2019 hosi Organizasaun Mundiál Saúde hatudu taxa mortalidade ba MLH hamutuk 3.300 ka 45% no 20% mate prematura ka mate sedu.

Nia dehan, Timor-Leste sai hanesan taxa fuma aas iha mundu, solusaun mak presiza Governu reforsa lei tabaku nian no aloka rekursu sira ne’ebé adekuadu ba kombate tabagismu no hasa’e taxa, folin tabaku nian hodi hamenus asesibilidade hosi foin sa’e sira.

Diretór Ezekutivu FONGTIL, Daniel Santos do Carmo, hateten Sosiedade Sivíl hanesan parseiru estratéjika hamutuk ho ANCT-TL asegura implementasaun lei kontrolu tabaku nian ne’ebé iha dekretu lei númeru 14/2016 8 juñu 2016.

“Dala barak ona ita halo diskusaun hasa’e taxa tabaku, maibé realidade la sa’e, entaun ida ne’e depende ba boa vontade polítiku sira nian hanesan Ministériu Finansa diresaun taxa nian, Parlamentu Nasionál, Konsellu Ministru no ita-nia rekomendasaun mak hasa’e taxa tabaku,” nia dehan.

Diretór Autoridade Aduaneira (AA) Alfándega, José António Fátima Abílio hateten, tabaku hanesan fatór risku importante ema-nia vida, no TL rasik asina ona konvensaun kuadru legál Organizasaun Mundiál Saúde ba tabaku iha 25 maiu 2004 no ratifika iha 22 dezembru 2004 maibé TL númeru fuma kontinua aas.

“Dadus ne’ebé ita rekolla iha ita-nia sistema totál kilograma importasaun tabaku iha 2020 hamutuk 866.426.05 kilograma no iha 2021 hahú janeiru to’o jullu 463.566.000 kilograma, signifika ita-nia nasaun konsumu tabaku makaas tebes,” nia hatutan.

Atu redús númeru importasaun meiu ida mak tenke hasa’e folin taxa seletivu konsumu halo boot, maibé lei tributária númeru 8/2008 agora iha hela prosesu revizaun ne’ebé mak Autoridade Aduaneira no tributária servisu hamutuk halo hela revizaun.

“Ita espera katak bele konklui iha tinan ida ne’e ita bele konsulta ho sosiedade sivíl bele lori ba Parlamentu Nasionál tanba ko’alia kona-ba reseita fiskál ne’e regula ho lei ne’e kompeténsia Parlamentu Nasionál,” nia hateten.

Nia hatutan, atu hasa’e taxa tabaku ne’e ko’alia kleur ona maibé seidauk realiza tanba ida ne’e presiza lei ruma ne’ebé lori ba Parlamentu Nasionál atu debate.

Prezidente Komisaun F Parlamentu Nasionál ne’ebé trata asuntu Saúde, Noe da Silva hateten, atu kombate konsumidór tabaku ne’ebé aas mak presiza lei ida hodi próteze sidadaun sira maibé ida ne’e fila-fali ba sidadaun sira rasik.

Nia dehan, iha artigu 57-61 fó liberdade ba sidadaun sira iha relasaun saúde no meiu ambiente maibé la taka dalan mós ba Estadu liuliu ba Parlamentu Nasionál hodi estabelese lei ruma hodi bele próteze sidadaun sira liuhosi fuma tabaku ne’ebé makaas.

“Tuir rejime kontrolu tabaku dekretu lei 14/2016 8 juñu TL sai hanesan nasaun ne’ebé porsentu boot tebes ba fuma ne’e hatudu mai ita katak ita iha hela númeru risku aas tanba ne’e presiza ita hotu-nia preokupasaun atu asegura família hodi livre hosi fuma no presiza hasa’e taxa tabaku, hanesan agora tabaku kilograma ida $ 19 bele bao in bele hasa’e ba tabaku kilograma ida, $ 30,” nia dehan.

Liuhosi semináriu refere halo lansamentu mós ba livru hasa’e taxa tabaku ba Timor-Leste saudavel, oinsá ba oin bele halo kontrolu tabaku ho di’ak, no semináriu ne’e hala’o tanba hetan apoiu tékniku hosi The Union, Ministériu Saúde, Organizasaun Mundiál Saúde.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here