Embaixadór Austrália iha TL, Peter Roberts entrega fatin izolamentu COVID-19 ba Ministra Saúde (MS), Odete Maria Freitas Belo, iha aldeia Bilicou, suku Holsa, postu administrativu Maliana, munisípiu Bobonaro, kuarta (04/08/21). Imajen Tatoli/Sérgio da Cruz.

BOBONARO, 04 agostu 2021 (TATOLI)—Governu Austrália, liuhosi Embaixada iha Timor-Leste (TL), entrega fatin izolamentu COVID-19 iha aldeia Bilicou, suku Holsa, postu administrativu Maliana, munisípiu Bobonaro ba Ministériu Saúde (MS) kuarta ne’e.

Objetivu instalasaun fatin izolamentu iha Munisípiu ne’e atu hadi’a prestasaun kuidadu saúde ba komunidade infetadu COVID-19.

Notísia relevante:Austrália oferese tan AstraZeneca doze 45.000 ba TL

“Agradese ba Governu Austrália, ne’ebé iha kompromisiu boot hodi ajuda kombate COVID-19 iha Timor-Leste. Ita rekoñese Austrália hanesan ita-nia parseiru, ne’ebé durante pandemia apoia reabilita infraestrutura saúde barak, hodi atende situasaun emerjénsia,” Ministra Saúde (MS), Odete Maria Freitas Belo, hateten iha serimónia entrega ne’ebé hala’o iha Ospitál tuan Maliana.

Ministra Saúde rekoñese katak, desde Timor-Leste restaura independénsia Governu Austrália apoia makás iha área prestasaun saúde, finansiamentu ba formasaun rekursu umanu, infraestrutura no mós iha situasaun pandemia, kontinua apoia ekipamentu protesaun pesoál inklui vasina AstraZeneca hamutuk doze 277.850.

Iha fatin hanesan, Embaixadór Austrália iha TL, Peter Roberts, hateten apoiu ida-ne’e atu ajuda Governu TL hodi prevene COVID-19.

Embaixadór ne’e mós kontente haree dezenvolvimentu infraestrutura saúde iha TL ne’ebé F-FDTL no Forsa Autralianu reabilita ho durasaun tempu badak no ninia atinjimentu iha duni kualidade.

Nune’e mós Sekretáriu autoridade munisipál Bobonaro, Júlio Caero, rekoñese durante ne’e laiha fatin izolamentu apropriadu, tanba ne’e obra ida-ne’e bele reforsa ekipa konjuta SIJK, atu bele atinje meta redusaun COVID-19 iha Bobonaro.

Serimónia ne’e, partsipa hosi Ministru Defeza, Filomeno da Paixão de Jesus, Tenente Jenerál, Lere Anan Timur ho espoza, parseiru internasionál sira, konvidadu-sira.

Obra ne’e, reabilita hosi servisu parseria entre FALINTIL Forsa Defeza Timor-Leste (F-FDTL) no Forsa Autralianu durante semana tolu hahú 12 jullu to’o finaliza ho totál rihun $180.

Serbisu signifikativu ne’ebé halo maka, re-instala fiu eletrisidade, monta vintuña foun no monta jeradór tuir padraun Austrália, konstrui moru foun, monta kama 50 ho meza, kompleta mós ho mákina imprime rua ho CPU.

Izolamentu ne’e hetan bensaun hosi Pároku Parókia Santa Cruz Maliana, Padre Valério Gusmão.

Tuir planu, iha fulan agostu Governu Austrália mós sei reabilita tán izolamentu no laboratóriu COVID-19 iha munisípiu Covalima.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here