Osan Dollar Amerikanu. Imajen/Espesiál

DILI, 03 agostu 2021 (TATOLI)–Taxa ezekusaun reál fundu COVID-19 to’o iha loron 27 jullu atinje 33% ne’ebé korresponde millaun $94,1, hosi totál orsamentu retifikativu alokadu millaun $287,6, enkuantu taxa ezekusaun atuál ne’ebé inklui kompromisu no obrigasaun sira atinje ona 39%.

Tuir nota ne’ebé Agência TATOLI asesu iha tersa ne’e, taxa ezekusaun tuir klasifikasaun ekonómiku, a’as liu mak iha kategoria transferénsia públika ne’ebé ezekuta ona millaun $31,2 ka 38% hosi orsamentu alokadu millaun $81,2, tuir kedan ho bens no servisu ne’ebé mak ezekuta ona millaun $63,2 ka 33% hosi orsamentu alokadu millaun $194,5.

Kapitál menór ezekuta ona $503.2000 ka 14% hosi orsamentu alokadu millaun $3,7, enkuantu kapital dezenvolvimentu foin mak ezekuta $623.000 ka 8% hosi orsamentu alokadu millaun $8,1.

Nune’e, progresu ezekusaun reál tuir medida sosio-ekonómiku, hanesan apoiu ba empregu, ezekuta ona millaun $22,6 hosi orsamentu alokadu millaun $45,3, enkuantu moratóriu kréditu gasta ona 100% hosi orsamentu alokadu millaun $2.

Apoiu propina ba estudante ensinu superiór, ezekuta ona millaun $5,6 hosi orsamentu alokadu millaun $14.

“Relasiona ho subsídiu internet ba estudante ensinu superiór, daudaun ne’e Ministériu Finansa (MF) hein hela Ministériu Ensinu Superiór, Siénsia no Kultura (MESSK) atu submete rekezitu ba operadór telekomunikasaun sira hanesan Timor Telecom, Telemor no Telkomcel, nune’e Ministériu FInansa bele verifika uluk molok realiza pagamentu,” subliña nota hosi MF.

Nota ne’e relata mós katak, mitigasaun no prevensaun COVID-19 inklui finansiamentu operasaun Sentru Integradu Jestaun Krize (CIGC, sigla portugés) ezekuta ona millaun $6,7 hosi orsamentu alokadu millaun $82,3.

Pagamentu ba programa Cesta Bázika, ezekuta ona millaun $56,8 hosi orsamentu alokadu millaun $68.

Kona-ba finansiamentu suplementu remuneratóriu ba traballadór sira iha liña frente, Governu halo hela diskusaun no sei submete hikas redasaun finál Proposta Dekretu-Lei ba Konsellu Ministru hodi hetan apresiasaun no aprovasaun molok submete filafali ba Prezidente Repúblika.

Iha fulan-maiu 2021, Prezidente Repúblika promulga ona Lei Orsamentu Jerál Estadu (OJE) 2021 Retifikativu, ne’ebé lori mudansa iha dotasaun orsamentál lubun ida inklui dotasaun fundu COVID-19, ho montante inísiu millaun $31, hetan ona reforsu ho montante millaun $256,6, nune’e ninia totál orsamentu finál hamutuk millaun $287,6.

Mudansa iha dotasaun Fundu Espesiál COVID-19 ne’e, fó biban ba Governu hodi finansia medida sosio-ekonómiku neen hanesan, apoiu ba empregu, moratóriu kréditu, izensaun pagamentu propina no subsídiu internet ba estudante ensinu superiór, sosa produtu alimentár hosi produtór lokál, apoiu ba traballadór liña frente, medida mitigasaun no prevensaun COVID-19 inklui finansiamentu operasaun CIGC.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here