Vise-Ministru Agrikultura no Peska (MAP), Abílio Xavier de Araújo, asina nota entedimentu ho Universidade Nasionál Singapura, Lee Kong Chian Natural History Museum, iha salaun Dirasaun Jerál Floresta Caicoli, segunda (02/08). Imajen TATOLI/Francisco Sony

DILI, 02 agostu 2021 (TATOLI)-Ministériu Agrikultura no Peska (MAP) hamutuk Universidade Nasionál Singapura, Lee Kong Chian Natural History Museum, asina nota entendimentu halo peskiza kona-ba flora no fauna iha Timor-Leste.

Vise-Ministru Agrikultura no Peska, Abílio Xavier de Araújo, infroma, MAP halo esforsu ona durante tinan-rua liuhosi Konservasaun Internasionál atubele realiza entendimentu entre parte rua.

Vise-Ministru Agrikultura no Peska (MAP), Abílio Xavier de Araújo. Imajen TATOLI/Francisco Sony

“Ami konsege asina akordu ho Universidade Nasionál Singapura, liga ba kapasitasaun no peskiza, atu deskobre ita-nia rekursu naturál hanesan flora no fauna atu fó sustentabilidade ba nasaun no povu iha Timor-Leste,“ Vise Ministru, hateten, hafoin ramata seremónia iha salaun Dirasaun Jerál Floresta MAP, Caicoli, segunda ne’e.

Akordu ne’e realiza via virtuál, entre Vise-Ministru Abílio Xavier no Xefe Departementu Universidade Nasionál Singapura, Lee Kong Chian Natural History Museum, Peter Ng Kee Lin.

Objetivu akordu ne’e atu halo koservasaun no proteje riku-soin ne’ebé iha atubele dezenvolve no explora hodi fó benefísiu ekonómiku ba sidadaun Timor-Leste.

Nune’e, MAP sei halo diskusaun hodi tau orsamentu iha tinan fiskál 2022 atubele finansia atividade ne’e.

“Ita sei komunika ho tékniku sira atu halo analiza,” nia akresenta.

Nune’e, ezekutivu ne’e rekomenda ba universidade sira iha Timor-Leste  atu hahú hanoin ona hola parte  iha peskiza rekursu naturál, nune’e Governu bele dezenvolve no diversifika ekonomia.

Diretór Jerál Floresta, Kafé no Plantasaun Indústria, Raimundo Mau. Imajen TATOLI/Francisco Sony

Iha biban hanesan, Diretór Jerál Floresta, Kafé no Plantasaun Indústria, Raimundo Mau, konsidera, hanesan nasaun foun presiza halo kooperasaun ho nasaun dezenvolvidu sira atu halo peskiza ba rekursu naturál sira hodi bele konserva no proteje rekursu naturál.

“Ita iha obrigasaun atu garante direitu  Estadu Timor-Leste ba riku-soin sira ne’e tanba tinan barak nia laran peskizadór sira tama-sai, maibé laiha dokumentu ne’ebé kesi entre ita no siéntista sira ne’ebé mai,”nia dehan.

Nune’e, tuir Diretór, akordu ne’e iha vantajen boot atu siéntista ka peskizadór sira bele halo peskiza ba flora no fauna, iha tasi-laran no rai-maran atubele konserva no dezenvolve.

Diretór Konsevasaun Internasionál iha Timor-Leste, Manuel Mendes. Imajen TATOLI/Francisco Sony

Nune’e mós, Diretór Konservasaun Internasionál Timor-Leste, Manuel Mendes, hateten, área protejida sira iha área rai-maran no tasi presiza halo peskiza hodi bele konserva no proteje.

“Ita haree durante tinan barak peskizadór hosi rai barak mai halo peskiza iha área protejida hodi lori sai ita-nia riku-soin ne’ebé kuaze tinan 20 nia laran ita  lakon espesie barak iha Timor-Leste,” nia tenik.

Tanba ne’e, atu prevene kestaun ne’e, nia konsidera presiza salva guarda riku-soin sira hanesan bioversiade, flora no fauna iha área protejida sira.

“Ami hosi Konservasaun Internasionál hakarak kontinua apoiu ba Governu liuhosi Ministériu Agrikultura no Peska atu hodi konserva no proteje riku-soin sira iha Timor-Leste,” nia kompromete.

Seremónia ne’e akompaña hosi Diretór Jerál Floresta, Kafé no Plantasan Indústria, Seniór Vise-Prezidente, Conservation International Asia-Pacific, Richard Jeo, Board Member Conservation International Singapore, Leo Tan no Reitór universiade sira inklui konvidadu balun.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here