Eis  Embaixadór Timor-Leste iha Kuba, Loro Horta. Imajen/PCM

DILI, 02 agostu 2021 (TATOLI)-Eis  Embaixadór Timor-Leste iha Kuba, Loro Horta, agradese ba Estadu Timor-Leste no Governu, ne’ebé fó konfiansa ba nia hodi sai reprezentante país iha estranjeiru  durante tinan-lima.

“Durante ha’u-nia mandatu, kooperasaun Timor-Leste iha Kuba fundamentál liu iha área saúde no edukasaun, ne’ebé médiku timor-oan kuaze 1.000 halo ona graduasaun iha kuba, iha área pedolojia hamutuk 25 ne’ebé ramata ona estudu iha tinan 2017. Ha’u hanoin Embaixadór foun ba Kuba bele kontinua fó prioridade ba kooperasaun iha área médika no edukasaun,” Loro Horta hateten hafoin halo enkontru ho Ministru Presidénsia Konsellu Ministru, Fidelis Manuel Leite Mangalães, iha Palásiu Governu, segunda ne’e.

Tuir nia, antes ne’e Governu iha planu  haruka médiku 50 atu kontinua estudu iha kuba foti espesialista, maibé situasaun pandemia imposível atu realiza, tanba ne’e iha futuru iha posibilidade atu tau prioridade.

“Timor-Leste iha médiku barak,  maibé klínika jerál hakarak  forma espesialista kardolojia, oftalmolojia, tékniku laborátoriu no farmásia inklui administrasaun ospitál,” nia akresenta.

Nune’e, eis Diplomata husu ba Embaixadór foun  Kuba, Eusébio Cursino, atu kontinua serbisu ho transpáransia hodi hametin relasaun bilaterál.

Loro Horta simu pose nu’udar Embaixadór Timor-Leste ba Kuba hosi eis Prezidente Repúblika, Taur Matan Ruak, iha tinan 2016 no mandatu ramata iha tinan 2021.

“Ha’u hasoru malu ho Ministru Fidelis hodi agradese apoiu hosi Estadu durante sai Embaixadór reprezenta Timor-Leste iha Kuba, ha’u ramata misaun no mai Timor-Leste hodi kontinua prepara no prontu kontribui ba dezenvolvimentu Timor-Leste. Ha’u iha kuba durante tinan-lima hodi serbí Timor-Leste tanba iha tinan 2016, kuandu ha’u halo traballu profisionál iha Embaixada sempre ativu durante tinan-lima, ha’u servisu iha kuba no konsege uza osan rasik hodi halo atividade ba Embaixada,” nia haktuir.

Nia konsidera, misaun Embaixadór la’ós tanba hetan saláriu di’ak, maibé tanba iha nasionalizmu, tanba ne’e nia orgullu sai diplomata tanba bele serbí país.

Eis Embaixadór ne’e apresia servisu Governu tanba maski nasaun hasoru problema atu halo jestaun ba pandemia, maibé Timor-Leste nia atendimentu saúde di’ak tebes.

“Ita haree situasaun Timor-Leste difísil kona-ba COVID-19 no kestaun inundasaun,  maibé Governu mantein estável no servisu saúde la’o ho di’ak ,” nia tenik.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here