Estudante sira tuir ezame. Imajen Tatoli/Abilio Elo Nini.

OÉ-CUSSE, 02 agostu 2021 (TATOLI)—Estudante klase nuno-ano na’in 224 iha Eskola Ensinu Bázika Sentrál (EBC) 01 de Maio Palaban, Sub-Rejiaun Pante Makasar, kontribui osan $1 ba eskola hodi sosa ekipamentu hanesan surat-tahan, hadi’a printer, sosa tinta hodi produz materia ezame segundu periodu ba tinan 2021.

“Ami husu sira kontribui $1, nune’e bele sosa matéria didátika hanesan sura-tahan, tinta nomós hadi’a printer ne’ebé aat atu nune’e uza prodús pontu ezame tuir sistema nasionál. Tanba, sira na’in-224 hanesan klase preparativa ezame nasionál tinan ne’e,” Diretór EBC 01 de Maio Palaban, Vincencio Cono, informa ba Agência Tatoli iha Palaban, Suku Costa, Sub-Rejiaun Pante Makasar, segunda ne’e.

Dirijente eskola sentrál ne’e fundamenta, situasaun ne’e akontese iha nuno-ano, enkuantu sétimu-ano no oitavu-ano hakerek de’it matéria ezame iha kuadru.

Nia dehan, iha ezame primeiru períodu liuba, sira hetan apoia matéria didátika liuhosi distribuisaun osan ba fulan ida durante períodu ida. 

Estudante sira tuir ezame. Imajen Tatoli/Abilio Elo Nini.

“Ami la’ós lakohi halo pontus de ezame maibé profesór sira triste tanba hanorin períodu ida tomak to’o ezame segundu períodu ne’e fó pergunta númeru rua de’it ba alunu sira atu responde. Ida-ne’e ladún fó satisfasaun ba profesór sira. Tanba ne’e atu atinje meta pedagójika iha períodu ida, alunu sira sente babain maibé profesór sente triste tanba laiha benefísiu ba estudante sira,” nia dehan.

Nia hateten, estudante sira labele hetan surat-tahan atu hakerek resposta tanba laiha orsamentu eskolár atu uza hodi sosa matéria didátika nomós distribuisaun matéria didátika hosi edukasaun mai eskola laiha, entaun estudante sira prepara rasik surat-tahan.

Entretantu totál estudante iha Eskola Ensino Báziku Sentrál (EBC) 01 de Maio Palaban hamutuk ema na’in-789, totál profesór hamutuk na’in-27 inklui guarda na’in-rua.

Sekretária Rejionál Asuntu Edukasaun Solidariedade Sosiál, Avelina da Costa, hateten preokupasaun mestre sira-nian kona-ba matéria didátika tanba relatóriu kona-ba osan ne’ebé uluk aloka-ba eskola, oras ne’e tarde hatama no espera iha tempu badak bele hatama ona relatóriu.

“Hanesan babain ne’e presiza iha print ba pontus de ezame hanesan esay-test, eskolla multiplas no kompleta fraze maibé agora daudaun ne’e situasaun COVID-19, ita labele ba Dili atu sosa iha Oé-Cusse maibé laiha. Entaun, maneira rasik depende kada eskola halo ditadu, hakerek iha kuadru hafoin maka alunu sira responde iha surat-tahan. Tanba ne’e mak ami fahe surat-tahan nune’e bele fasilita alunu sira,” nia dehan.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here