Sekretáriu Estadu Kooperativa, Elizário Ferreira. Imajen Tatoli/António Gonçalves

AINARO, 30 jullu 2021 (TATOLI)—Governu husu ba komunidade sira iha Aldeia Bahá, Suku Foho Ailiku, Postu Administrativu Hato-udo, Munisipiu Ainaro, atu transforma lagoa Erheu ba kooperativa ida integrada.

Sekretáriu Estadu Kooperativa (SEKoop), Elizário Ferreira, hateten objetivu hala’o kooperativa integrada ne’e atu bele dada ema ka vizitante sira hodi bele vizita fatin ne’e no fó benefísiu ekonomia ba populasaun sira.

“Lagoa ida-ne’e, sai hanesan lagoa ida-ne’ebé bele nakfilak ba lagoa ida ho dezenvolvomentu integradu. Fatin lagoa ida ne’e bele sai hanesan moris kooperativa de peska,” Elizário Ferreira hateten durante partisipa iha atividade kolleta ikan iha Lagoa Erheu, sesta ne’e.

Governante ne’e hateten, hosi kooperativa de peska ne’e bele mós kria fatin ba ema hodi hakail ikan iha fatin ne’e, tanba bainhira iha peska atu mai sosa ikan, la presiza faan ikan maibé bele loke loza oan ida fa’an de’it kail ho ai-talin sira, kuandu ema mai haruka sira kail rasik.

“Kria de’it kondisaun halo oinsá mak halo au ida halo didi’ak dudu ba laran atu bele hakail. Ema kuandu gosta hakail, kleur ema gosta atu han ikan ne’ebé tunu no manas. Kuandu tunu ikan, la’ós ikan tunuu ikan de’it maibé bele tunu fehuk roupa, tunu fehuk, talas ne’ebé maihosi produtu lokál ne’e hodi oferese ba ema sira mai ne’e. Kuandu komesa kail to’o lokraik uitoan, ema gosta ona atu toba,” nia fó hanoin.

Nia hatutan, ba komunidade katak peska tenke sai hanesan kooperativa ida-ne’ebé bele prodús ikan sira hodi kontribui ba sira-nia ekonomia no nasaun nia ekonomia.

“Ohin loron, iha kapitál liu-liu Dili, ema halai ona hosi Ayam potong, sosis, no hakarak ba han naan fresku, ikan fresku. Entaun, komunidade sai baze oinsá bele haki’ak ikan. Ita halo atividade ne’e labele sai atividade haki’ak ikan de’it. Maibe bele haki’ak atividade ekonómika hotu. Entaun, bele sai sentru. Kooperativa prontu atu bele kontribui,” nia dehan.

Nune’e mós nia enkoraja komunidade atu promove kooperativa “green house” ka uma modok ne’ebé prodús ho materiál lokál no naturál sira hanesan au-betun ho seluk tan.

“Ema-ne’ebé mai hela iha fatin ida-ne’e, ema presiza de’it ita atu asegura ho seguransa hanesan kalan toba karik labele tarutu. Seguransa ne’ebé bele asegura ema-nia vizita mai ita-nia fatin. Ida seluk, kuandu ema komesa hela ne’e ema hakarak han. Família bele promove restaurante ba kafé,” nia dehan.

Enkuantu, ikan ne’ebé hakiak durante hosi 2017 to’o 2021 iha Lagoa Erheu Hato-udo ne’e la’o durante tinan neen (6) ona no foin mak kolleta.

Jornalista : Natalino Costa

Editór       : Cancio Ximenes

HAKEREK NO HATÁN

Please enter your comment!
Please enter your name here